Laura’s Artsakh ապրանքանիշը հոբբիից վերածվում է լուրջ բիզնեսի (տեսանյութ)
- 20:37 13.08.2024
Laura’s Artsakh-ը հայտնի էր Արցախում, հատկապես երեխաներ ունեցող ընտանիքներում։ Ծովինար Գրիգորյանը ստեղծում էր անհավանական անկողնային պարագաները ծննդատնից դուրս գրվելու համար, նաեւ օրորոցների, մանկասայլակների, սենյակների համար։
Ըստ Ծովինարի՝ Laura’s Artsakh-ը ստեղծվել է որպես հոբբի, աշխատանքից դուրս սիրելի զբաղմունք և երեխաներին ու նրանց ծնողներին ուրախացնելու հաճելի հնարավորություն։
Արցախի բնիկ բնակչության տեղահանությունից հետո, հայտնվելով Հայաստանում, Ծովինարն այդպես էլ չկարողացավ աշխատանքի անցնել, թեև իր ոլորտի լավագույն մասնագետներից է։
Հետո ստիպված եղան Laura’s Artsakh-ը դարձնել ընտանիքի հիմնական եկամուտը։
Դեռևս զգալի եկամուտ չկա, բայց կան նախադրյալներ, քանի որ տարբեր հարթակներում ներկայացված Laura’s Artsakh-ի արտադրանքը հետաքրքրություն է առաջացնում։ Ապրանքանիշի գլխավոր մեխն այն է, որ Ծովինարն իր աշխատանքներում օգտագործում է արցախյան ավանդական գույնն ու բարբառը։
Սիսիանում տեղի ունեցած հայ-իրանական «Նավասարդ» երրորդ փառատոնում Արցախի պատվիրակությանը տրամադրված չորս տաղավարներից մեկը զբաղեցրել են Laura’s Artsakh-ի բարձերն ու պայուսակները։ Մրցույթի արդյունքներով արցախցիները մտել են միջոցառման լավագույն եռյակը։
Ալվարդ Գրիգորյան
