Արցախյան գյուղերի ավերված տների քարերն օգտագործվում են Ֆիզուլի-Շուշի ճանապարհի կառուցման համար

Հադրութցի ճարտարապետ և շինարար Գագիկ Ավանեսյանը, մեկնաբանելով Արցախի ՄԻՊ գրասենյակի հայտարարությունը ղարաբաղյան Մոխրենես գյուղի ավերման մասին, կարծիք է հայտնել, որ «ավերելով տներ, գերեզմաններ, եկեղեցիներ՝ ադրբեջանական կողմը օգտագործում է քարերը Ֆիզուլի-Շուշի ճանապարհի կառուցման համար»։

«Արցախի ինքնության միտումնավոր ոչնչացումից բացի, Ադրբեջանի կառավարությունը ոչնչացնում է այն ամենը, ինչ գտնվում է կառուցվող Ֆուզուլի-Շուշի մայրուղու ճանապարհին։ Նման պրակտիկա կիրառվել է Ադրբեջանի իշխանությունների կողմից դեռ խորհրդային տարիներին։ Հետագայում բազմաթիվ շենքերում հայտնաբերվել են հայկական տապանաքարեր և խաչքարեր։ Հիմա էլ արցախյան գյուղերն անդառնալիորեն ավերվում են, իսկ քարերն օգտագործվում են որպես շինանյութ։

Քանի որ արցախյան բոլոր գյուղերն իրենց ատրիբուտներով կրում են պատմամշակութային արժեք, մենք պետք է այնպես անենք, որ Ադրբեջանը դադարեցնի վանդալիզմը և պատասխան տա իր գործողությունների համար»։

Ալվարդ Գրիգորյան