Մոսկալևը՝ Կուրսկի ուկրաինացի պարետ, Մատվիենկոն՝ ՌԴ Սենատի նախագահ
- 17:54 16.08.2024
Կուրսկի մարզում ուկրաինական զորքերի առաջխաղացումից և Ռուսաստանի ավելի քան հազար քառակուսի կիլոմետր տարածքի վրա վերահսկողություն հաստատելուց հետո Կիևը սկսեց կառավարող մարմիններ ձևավորել այդ տարածքներում։
Գեներալ-մայոր Էդուարդ Մոսկալևը դարձավ առաջին հրամանատարը, ով անձնավորելու է Ուկրաինայի իշխանությունները Ռուսաստանի տարածքում։ «Ոչ ոք հստակ չգիտի, թե ինչու է Մոսկալևը նշանակվել Կուրսկի շրջանի հրամանատար, բայց նույնիսկ Գլխավոր շտաբում կատակում են, որ պատճառը կարող էր նրա ազգանունը լիներ», – կատակում է Ուկրաինայի ռազմական ղեկավարությանը մոտ կանգնած BBC-ի զրուցակիցը:
Ռուս-ուկրաինական պատերազմը չհանգեցրեց բնակչության տարանջատմանը, ինչպես դա եղավ հայ-ադրբեջանական հակամարտության դեպքում։ Մեր հակամարտությունում դժվար թե հնարավոր լինի պատկերացնել, որ Բաքուն Արցախում պարետ կնշանակի հայկական ազգանունով ադրբեջանական գեներալի։
Դժվար է հասկանալ նաև, որ Ռուսաստանի Դաշնությունների խորհրդի խոսնակը ուկրաինական ազգանունով կին է՝ Վալենտինա Մատվիենկո։ Իսկ ռուսական բանակում ծառայում են բազմաթիվ ուկրաինական ծագումով սպաներ։
Ռուսական դպրոցներում երբեմն պատահում է, որ ուսուցիչների և աշակերտների կեսը ուկրաինացիներ են, եւ այս դպրոցներում «Հայրենասիրության դասի» ժամին մաթեմատիկայի դասեր են պատրաստում։
Ի դեպ, ռուսական բանակում զգալի թվով ուկրաինացիների առկայությունով են երբեմն բացատրում Ուկրաինայում այս բանակի դանդաղկոտությունը։
Զգալի դեր է խաղում նաև այն, որ թե՛ Ռուսաստանում, թե՛ Ուկրաինայում ապրում են հարյուրավոր ազգություններ, և շատերը պայքարում են միմյանց դեմ։ Ասենք Ռուսաստանի հայերը ստեղծել են Արբատ գումարտակը և Ուկրաինայում կռվում են հայկական գնդի դեմ։ Մարգարիտա Սիմոնյանը համարվում է ռուս մեծագույն ազգայնականը, իսկ Սերգեյ Նիգոյանը՝ ուկրաինական մայդանի խորհրդանիշներից։ Եվ պատահական չէ, որ ռուսական հետախուզությունը «պարզել է», թե ԱՄՆ-ն իբր պատրաստում է Արսեն Ավակովին՝ փոխարինելու Զելենսկին։