Վաշինգտոնը խրախուսում է Բաքվին և Մոսկվային քանդել Մինսկի խումբը

Միացյալ Նահանգները պատրաստ է աշխատել Ադրբեջանի ու Հայաստանի հետ ցանկացած ձևաչափով, որին կհամաձայնվեն կողմերը և որտեղ վերջիններս կարող են առաջընթաց գրանցել, արձագանքել է ԱՄՆ պետքարտուղարությունը՝ ի պատասխան «Ամերիկայի ձայնի» հայկական ծառայության հարցմանը՝ կապված ԵԱՀԿ Մինսկի խմբի ձևաչափի ապագայի և դրա շուրջ ամերիկյան կողմի դիրքորոշման հետ:

Պետքարտուղարությունն իր պատասխանում ընդգծել է. «Միացյալ Նահանգների կառավարությունն աջակցում է Հայաստանի և Ադրբեջանի ջանքերին՝ հասնելու կայուն և արժանապատիվ խաղաղության համաձայնագրին։ Մենք պատրաստ ենք աշխատել երկու կողմի հետ ցանկացած ձևաչափով, որի շուրջ կողմերը կարող են գալ համաձայնության և որտեղ կարող են գրանցել առաջընթաց»,- հայտնել են ԱՄՆ պետքարտուղարությունից:

Պետքարտուղարության պատասխանը հուշում է, որ ԱՄՆ-ը չի բացառում Մինսկի խմբի մանդատի չեղարկումը, ինչը համառորեն պնդում են Բաքուն և Մոսկվան։ Եվ քանի որ հայկական կողմը համաձայն չէ (ինչպես պնդում է Ալիևը), ԱՄՆ-ն իր հայտարարությամբ խրախուսում է Բաքվին և Մոսկվային ուժով ստիպել Երևանին համաձայնության գալ։

Բաքվի և Մոսկվայի կողմից Հայաստանի դեմ հնարավոր սադրանքների պատասխանատվությունը կրելու է նաև Միացյալ Նահանգները։