Ադրբեջանի՝ BRICS մտնելու կապակցությամբ Ուկրաինայում կոչ են արել բոյկոտել SOCAR-ը
- 22:03 20.08.2024
ԲՐԻԿՍ-ին անդամակցելու Ադրբեջանի դիմումի ֆոնին հայտնի են դարձել Ուկրաինայում նրա SOCAR ընկերության գործունեության մանրամասները։ Հնարավոր է, որ դրա միջոցով երկիր մտել են ռուսական նավթամթերքներ։ Այս մասին Facebook-ում հայտնել է ուկրաինական խոշոր վառելիք ներկրող, Prime ընկերությունների խմբի հիմնադիր Դմիտրի Լեուշկինը։
Գործարարը կոչ է արել Ուկրաինայի պետական և մասնավոր ընկերություններին հրաժարվել SOCAR-ի հետ համագործակցությունից։ «Շատ տհաճ է, որ նրանք (ադրբեջանցիները – խմբ.) դա արել են մեզ հետ։ Բայց մենք պետք է արձագանքենք ԲՐԻԿՍ նրանց մուտքին։ Նրանց համար մեր շուկան շատ գայթակղիչ է, և նրանք այստեղ բավականաչափ ակտիվներ ունեն։ Ես խնդրում եմ հարգենք ինքներս մեզ: Եթե այսպես թողնենք, ապա վաղը նոր դրսեւորումներ կլինեն»,- ասաց ձեռնարկատերը։
Նա կարծում է, որ ԲՐԻԿՍ-ին Ադրբեջանի մուտքին Ուկրաինայի արձագանքը պետք է լինի պետության և բիզնեսի մակարդակով։ Այսպիսով, ուկրաինական ընկերությունները պետք է հրաժարվեն վառելիք ներկրելուց SOCAR-ին պատկանող թուրքական Star գործարանից։ Այնտեղ, նշել է Լեուշկինը, դիզելը «եփվում է», ի թիվս այլ բաների, ռուսական նավթից։ Չնայած դրան, ներկրողները շարունակում են այն գնել՝ համալրելով ռուսական գանձարանը։
Գործարարը նաև կոչ է արել ադրբեջանական ընկերությունը պետական մակարդակով ճանաչվել որպես ռիսկային, և իրավապահ մարմինները մանրակրկիտ հետաքննել դրա գործունեությունը։ «Ընկերներ, եկեք հարգենք ինքներս մեզ, և եթե մեզ ծախել են, ապա մենք չենք կարող դա թողնել առանց արձագանքի», – ասաց Լեուշկինը: