Արցախի Հանրապետությունը չի կարելի տարանջատել Հայաստանի Հանրապետությունից․ Զոլյան

Արցախի Հանրապետությունը չի կարելի տարանջատել Հայաստանի Հանրապետությունից, որովհետեւ Անկախության հռչակագրի հիմքում 1989 թվականի դեկտեմբերի 1-ի վերամիավորման մասին որոշումն է։ Այս մասին Անկախության հռչակագրի 34-րդ տարեդարձի առթիվ «Գերագույն խորհուրդ» պատգամավորական ակումբի նախագահության հրավիրած հավաքում ասաց ԳԽ Արցախի հարցերի հատուկ հանձնաժողովի քարտուղար, քաղաքագետ Սուրեն Զոլյանը։

«Եթե մեր պետական այրերն ուզում են վերանայել Անակախության հռչակագիրը, նախ եւ առաջ իրենց պաշտոններից պետք է հրաժարվեն, որովհետեւ իրենց այսօրվա պաշտոններն ածանցյալ են այս հռչակագրից։ Այդ փաստաթուղթն ընդունվել է ոչ թե Արեւելյան Հայաստանի, այլ միացյալ Հայաստանի համար, որովհետեւ մինչեւ այդ եղել է դեկտեմբերի 1-ի որոշումը։ Այսինքն՝ այն ժամանակվա հիմնադիր փաստաթուղթն ընդունվել է համատեղ, ուստի, չի կարելի տարանջատել մի մասը, ես նկատի ունեմ Արցախի Հանրապետությունը եւ դրանով ռեվիզիայի ենթարկել այս փաստաթուղթը։ Ի դեպ, Ադրբեջանը դա ավելի ճիշտ է հասկանում, քան այսօրվա իշխանավորները, դրա համար այդպիսի մեծ ուշադրություն է դարձնում այդ փաստաթղթին»,- հայտարարեց Զոլյանը։