«Ֆրեսկոներ Փարաջանովի համար»․ Պոլինա Չիժևսկայի ցուցահանդեսը Երևանում

Սեպտեմբերի 10-20-ը Երևանի թատրոնի և կինոյի պետական ինստիտուտում գործելու է իսրայելցի նկարչուհի Պոլինա Չիժևսկայի «Ֆրեսկոներ Փարաջանովի համար» խորագրով ցուցահանդեսը։

Նկարչուհու սերը հայկական մշակույթի նկատմամբ ծնվել է դեռ երիտասարդ տարիքում՝ Մինաս Ավետիսյանի և Մարտիրոս Սարյանի հանճարեղ գեղանկարչությանը ծանոթանալուց հետո, իսկ Սերգեյ Փարաջանովի ֆիլմերը դարձել են իրական բացահայտում երիտասարդ նկարչուհու համար։

Գեղարվեստական արտահայտության ճշգրտությունը, կերպարների և խորհրդանիշների խորությունը վկայում էին այն մասին, որ գոյություն ունի արվեստի «ծածկագրային» լեզու, որի միջոցով նկարիչները կարող են միմյանց հասկանալ ժամանակի և տարածության միջով։

«Ֆրեսկոներ Փարաջանովի համար» շարքը ստեղծվել է 1996-1997 թվականներին և հարգանքի տուրք է արվեստի մեծ վարպետին։ Աշխատանքներում օգտագործված են Փարաջանովի ֆիլմերից խորհրդանիշներ՝ Պոլինայի ընկալմամբ․ նուռը՝ հոգու խորհրդանիշ, վիտրաժը՝ ճշմարտության խորհրդանիշ, որը հավերժ գոյություն ունի, սակայն թաքնված է մարդկանցից, ովքեր չեն ցանկանում կամ չեն կարողանում այն տեսնել։

Այս ցուցահանդեսը Սերգեյ Փարաջանովի ճակատագրի և ստեղծագործության դրամատիկ, պոետիկ լուսաբանումն է։ Սա յուրատեսակ ուղերձ է գեղարվեստական կերպարների միջոցով, հիշեցում այն մասին, որ մարդու ազատությունը հնարավոր է ինչպես արվեստում, այնպես էլ կյանքում։

-Ցուցահանդեսն իմ երախտագիտությունն է ուղղված Վարպետի մեծ ժառանգությանը, որն ինձ համար ներշնչման նոր ճանապարհներ է բացել։ Նրա ֆիլմերը շատ չեն, բայց դրանք նրան բերեցին համաշխարհային ճանաչում և կինեմատոգրաֆում նոր խոսքի փառք։ Սերգեյ Փարաջանովի ստեղծագործություններն իմ ներկայացման կարիքը չունեն, սակայն ես երջանիկ եմ, որ գիտեմ մարդկանց, ովքեր բացահայտել են վարպետի ֆիլմերն ու ճակատագիրը՝ այս ընծայի միջոցով,-ասում է նկարչուհի Պոլինա Չիժևսկայան։

Այդ մասին հայտնում է ԵՐԵՎԱՆԻ ԹԱՏՐՈՆԻ ԵՎ ԿԻՆՈՅԻ ՊԵՏԱԿԱՆ ԻՆՍՏԻՏՈՒՏԸ