Հայաստանի ԱԳՆ-ն ճանաչել է էթնիկ զտումները, սակայն դեօկուպացիայի կոչ չի արել

Հայաստանի ԱԳՆ-ն հայտարարություն է տարածել սեպտեմբերի 19-ի կապակցությամբ, որը Արցախի խորհրդարանը հռչակել է որպես Արցախի ցեղասպանության օր։

Արտաքին գործերի նախարարությունը սեպտեմբերի 19-ի իրադարձություններն անվանել է «Լեռնային Ղարաբաղի բնիկ բնակչության էթնիկ զտումների ավարտական փուլը, երբ ավելի քան 115 հազար հայեր ստիպված են եղել լքել իրենց տները մի քանի օրվա ընթացքում ռազմական գործողությունների արդյունքում»։

Միաժամանակ, Հայաստանի ԱԳՆ-ն անդրադառնում է ՄԱԿ-ում տեղի ունեցած նիստին, որն, ըստ էության, օրինականացրել է Արցախի հանդեպ ագրեսիան և օկուպացիան։

«Դա տեղի ունեցավ ՄԱԿ Գլխավոր ասամբլեայի նստաշրջանի ընթացքում, երբ ողջ միջազգային հանրությունը հերթական անգամ քննարկում էր հակամարտությունների խաղաղ կարգավորման, կայունության հաստատման ու զարգացման հրամայականը՝ դատապարտելով ուժի կիրառման, միջազգային նորմերի, մարդու իրավունքների խախտումների դրսևորումներն աշխարհի տարբեր անկյուններում»,- նշում է ՀՀ ԱԳՆ-ն։

Նախարարությունը տարածաշրջանային դերակատարներին կոչ է արել քաղաքական կամք դրսևորել խաղաղության վերջնական հաստատման համար՝ հիմնված ինքնիշխանության, տարածքային ամբողջականության և տարածաշրջանի կայուն զարգացման վրա։

Հայաստանի ԱԳՆ-ն, խոսելով էթնիկ զտումների փաստի մասին, կոչ է անում «տարածաշրջանային դերակատարներին» ոչ թե պահպանել միջազգային նորմերը, մասնավորապես՝ հակամարտությունների ուժային լուծման անթույլատրելիության սկզբունքը, ոչ թե վերադառնալ ԵԱՀԿ Մինսկի խմբի ձևաչափին՞ ոչ թե դեօկուպացիայի, ոչ թե Հայաստանի Հանրապետության Սահմանադրությունըհարգելուն, որը հղում է անում Արցախի և Հայաստանի վերամիավորման որոշմանը, այլ կոչ է անում պատրանքային խաղաղության և կայունության։