«Հայերի ցեղասպանությունը. անցյալի և ներկայի ներհայեցումներ»

Արդի աշխարհաքաղաքական իրողությունների համատեքստում, երբ աշխարհի տարբեր անկյուններում պարբերաբար ականատես էինք լինում էթնիկական զտումների, ցեղասպանությունների և բնիկ ժողովուրդների հայրենի բնօրանների բռնազավթմանը, ցեղասպանագիտական միջազգային գիտաժողովների և համաժողովների կազմակերպումը դառնում է առավել հրատապ և արդիական: Հատկապես, երբ նման նախաձեռնություն իրականացվում էր ցեղասպանություններ վերապրած ազգի կողմից։

Այդ նախաձեռնություններից հերթականը կազմակերպվել է սեպտեմբերի 19-21-ին՝ Հայաստանում, Երևանի պետական համալսարանում։ Գիտաքաղաքական նշանակություն ունեցող սույն գիտաժողովը կազմակերպվել է Երևանի պետական համալսարանի, ՀՀ ԳԱԱ Պատմության ինստիտուտի, Կալիֆորնիայի նահանգային համալսարանի Նորթրիջի հայկական ուսմանց ծրագրի (ԱՄՆ) և Լեփսիուսհաուս Պոտսդամի (Գերմանիա) համագործակցությամբ։ Գիտաժողովը կրում է  «Հայերի ցեղասպանությունը. անցյալի և ներկայի ներհայեցումներ» խորագիրը և նվիրված է Ֆրանց Վերֆելի՝ սկզբնաղբյուրային արժեքավոր նշանակություն ունեցող «Մուսա լեռան քառասուն օրը» վեպի 90-ամյակին։

Գիտաժողովի թեմաներից է՝ Արցախի նկատմամբ Ադրբեջանի ցեղասպանական քաղաքականության դրսևորումները։

Զեկուցումներով հանդես կգան անվանի գիտնականներ և փորձագետներ Հայաստանից, ԱՄՆ-ից, Գերմանիայից, Ռուսաստանի Դաշնությունից, Իսպանիայից, Իտալիայից, Արգենտինայից, Ավստրալիայից, Բրազիլիայից, Լիբանանից և Կանադայից։

Գիտաժողովի նպատակն է ընդգծել այն հրամայականը, որ չդատապարտված ցեղասպանությունները ծնում են նոր ոճրագործություններ, որի դրսևորումը տարիներ առաջ աշխարհը տեսավ Մերձավոր Արևելքում, Հյուսիսային Աֆրիկայում, ապա նաև բռնազավթված Արցախում՝ ահաբեկչական խմբավորումների ներգրավվածությամբ։

Տաթև Ազիզյան