Լավ, մի՞թե ցանկություն չկա վերանայել, տեսնել ինչն է խնդիրը, ինչ է պետք շտկել
- 16:09 01.10.2024
Արցախցիների արտագաղթի ծավալը ցույց է տալիս, որ խնդիր կա։ Այս մասին ԱԺ նիստում ասաց «Հայաստան» խմբակցության պատգամավոր Արթուր Խաչատրյանը։
«Արցախի քաղաքացիները, որոնք 2020 թվականի մազապուրծ տեղափոխվեցին Հայաստան եւ 2023 թվականին տեղափոխվեցին Հայաստան, նրանց էական հատված դուրս է եղել Հայաստանից։ Եվ ոչ թե եկան երեկ ու գնացին, որ ասենք՝ տրանզիտային կայան էր Հայաստանը, եւ մարդիկ միտք չունեին մնալու, ոչ, մարդիկ եկան, մնացին, փորձեցին աշխատել, տուն գտնել, բայց չկարողացան, ընտանիք պահելու խնդիր ունեն, գոյության խնդիր ունեն։ Չենք ասում կառավարությունը որեւէ բան չի անում, անում է, բայց արդյունքը, որը մենք տեսնում ենք, չի կարող բավարար լինել։ Լավ, մի՞թե ցանկություն չկա վերանայել, տեսնել ինչն է խնդիրը, ինչ է պետք շտկել։ Վերջիվերջո մեր բոլորիս, մեր պետության, մեր ազգի նպատակներից է բխում, որ արցախահայերը մնան Հայաստանի Հանրապետությունում։ Հետեւաբար, պետք է վերատեսության ենթարկել, շտկել այդ ծրագրերը, որոնք այսօր իրականացվում են»,- ասաց Արթուր Խաչատրյանը։
Նա նշեց՝ արցախցիների հարցով ԱԺ քննիչ հանձնաժողովի օբյեկտիվ առաքելությունն է լինելու ուսումնասիրել այն ծրագրերը, որոնք այսօր իրականացվում են եւ բարելավումներ առաջարկել։
Նշենք, որ ԱԺ նիստում քննարկվեց բռնի տեղահանված եւ ՀՀ տեղափոխված Արցախի Հանրապետության ժողովրդի կենսագործունեության պայմաններն ուսումնասիրելու նպատակով ԱԺ քննիչ հանձնաժողով ստեղծելու հարցը։ ԱԺ նախագահ Ալեն Սիմոնյանն ասաց, որ հանձնաժողովն իրավունքի ուժով ստեղծվելու է։