“Ուլունքները տրամադրությունը զգալու հատկություն ունեն”, ասում է Մերին

Ծնվել Արցախում, լինել կենսաբան և անսահման սիրել ձեռագործությունը: Այս ամենը Մերիի մասին է, ով դեռ փոքր տարիքից տեսել է, թե ինչպես է մայրիկը ձեռագործ աքսեսուարներ պատրաստում:

Որպես իր սիրելի ուղղություն Մերին ընտրել է ուլունքագործությունը` սկզբից պայուսակներ էր պատրաստում, հետո կրծքազարդեր։ Ասում է, որ ինչպես գրեթե բոլոր աշխատանքները, սկզբից դժվար էր, բայց պետք է ուղղակի ունենալ մի փոքր նպատակասլացություն և կամքի ուժ դժվարությունները հաղթահարելու համար, և, իհարկե, գեղեցիկ մտքեր գեղեցիկը ստեղծելու համար:

«Վատ տրամադրությամբ ուլունքներ չեմ գործում: Ուլունքները տրամադրությունը զգալու հատկություն ունեն և չեն ենթարկվում, եթե դու վատ տրամադրությամբ ես փորձում դա անել: Ես իրոք փորձում եմ իմ ստեղծագործություններով մարդկանց փոխանցել դրական էներգիա»:

Ժամերով փնտրել ուլունքները, գտնել գունային ճիշտ համադրություն, համապատասխանեցնլ բոլոր ուլունքները իրար հետ և վերջում ստանալ այն ամենը, ինչը հաճույք է պարգևում ոչ միայն հաճախորդներին, այլև ստեղծողին:

Այս ամենը մի փոքր դժվար էր իրականացնել շրջափակման ժամանակ, բայց այդ ժամանակ էլ ո՛չ Մերին, ո՛չ էլ հաճախորդները չէին ընկճվում, փորձում էին ոչնչից ստանալ ինչ-որ բան, մի բան, որը այդ դժվար ժամանակներում գոնե մի փոքր կարող էր ուրախություն, սփոփանք պարգևել:

«Շրջափակման օրերին հումք չկար, հաճախորդները դա ևս հասկանում էին: Միասին հնարավոր տարբերակներ էինք գտնում և բավականին սիրուն աքսեսուարներ ստանում»:

Մերին այժմ ևս շարունակում է ստեղծագործել, բրոշների հավաքածուներին ավելացնելով նաև հարսանեկան գլխազարդեր:

Քրիստինե Ալավերդյան