Ամերիկացի օրենսդիրները Բաքվում հայտարարել են Երևանին աջակցության մասին
- 17:42 18.11.2024
Բաքվում ընթացող COP29-ի շրջանակներում կայացած մամուլի ասուլիսի ժամանակ ամերիկացի օրենսդիրները՝ Դեմոկրատական կուսակցությունը ներկայացնող սենատորներ Էդ Մարքին և Շելդոն Ուայթհաուսը, հայտարարել են Հայաստանին իրենց աջակցության մասին։
Ադրբեջանցի լրագրողներից մեկի հարցին՝ ինչու ԱՄՆ-ն և ԵՄ-ն պատժամիջոցներ չեն սահմանում Հայաստանի նկատմամբ, սենատոր Ուայթհաուսը պատասխանել է․ «Ես աջակցում եմ Հայաստանին։ Չեմ ուզում կանգ առնել հյուրընկալող երկրի {Ադրբեջանի} մարդու իրավունքների հարցերի վրա, բայց եթե դա թեմա դառնար, ապա ես նույնքան կոմպլեմենտար չէի լինի»։
Ասուլիսի մյուս բանախոս սենատոր Էդ Մարքին իր հերթին պնդել է՝ ադրբեջանցի քաղբանտարկյալները, ռազմագերիները պետք է ազատ արձակվեն, Լեռնային Ղարաբաղի հայերը պետք է վերադարձի իրավունք ունենան, Ադրբեջանն ու Հայաստանը պիտի խաղաղության համաձայնագիր կնքեն։
«Ինչպես Շելդոնն ասաց, գիտեք, մենք, ի վերջո, պետք է համոզվենք, որ ռազմագերիները ազատ կարձակվեն, և որ հայ ժողովուրդը իրավունք ունի խաղաղ վերադառնալու Լեռնային Ղարաբաղ», – ասել է սենատոր Մարքին:
«Մենք շատ ենք ցավում, որ այդքան շատ հայեր են տեղահանվել։ Ես, մեղմ ասած, հեռու եմ այն մտքից, որ հայերին կարելի է մեղադրել այս հարցում»,- նշել է sենատոր Շելդոն Ուայթհաուսը։