Պուտինը հաստատել է նորացված ռուսական միջուկային դոկտրինը Բայդենի հրթիռային որոշումից հետո
- 13:54 19.11.2024
BBC
Ռուսաստանի նախագահ Վլադիմիր Պուտինը հաստատել է միջուկային զսպման ոլորտում պետական քաղաքականության հիմքերը։ Նա միջուկային դոկտրինում փոփոխությունների մասին հայտարարեց դեռ ամռանը։ Նրա հրամանագիրը հնչել է այն լուրերի ֆոնին, որ ԱՄՆ նախագահը լիազորել է Ուկրաինային ԱՄՆ-ի հրթիռային հարվածներ հասցնել Ռուսաստանի խորքերը:
Փաստաթուղթը ստորագրելով՝ Պուտինը հաստատեց այն սկզբունքը, որ Ռուսաստանը կարող է միջուկային զենք օգտագործել՝ ի պատասխան իր կամ Բելառուսի դեմ ագրեսիայի՝ նույնիսկ սովորական զենքերի օգտագործմամբ, որոնք սպառնում են ինքնիշխանությանը և տարածքային ամբողջականությանը։
Ռազմական կոալիցիայի ցանկացած պետության ագրեսիան Ռուսաստանի կամ նրա դաշնակիցների դեմ համարվում է ագրեսիա ամբողջ կոալիցիայի կողմից, մեջբերում է Ինտերֆաքս փաստաթուղթը։
Պուտինի կողմից հաստատված պետական քաղաքականության սկզբունքներում նշվում է նաև, որ ոչ միջուկային պետության կողմից միջուկային պետության մասնակցությամբ կամ աջակցությամբ Ռուսաստանի դեմ ագրեսիան համարվում է համատեղ հարձակում։
Միջուկային զսպումը կկիրառվի, երբ պոտենցիալ հակառակորդը տեղակայի հակաօդային պաշտպանության համակարգեր, միջին և ավելի կարճ հեռահարության հրթիռներ, ճշգրիտ ոչ միջուկային զենքեր և հարձակողական անօդաչու սարքեր, ասվում է փաստաթղթում։
Պոտենցիալ հակառակորդի կողմից Ռուսաստանի սահմանների մոտ լայնածավալ զորավարժությունների պլանավորումն ու անցկացումը ճանաչվել է որպես ևս մեկ սպառնալիք, որի դեմ իրականացվում է միջուկային զսպում։
Գոյություն ունեցող ռազմական կոալիցիաների ստեղծումը կամ ընդլայնումը, որոնք ենթակառուցվածքները մոտեցնում են Ռուսաստանին, նույնպես կհամարվեն միջուկային զսպման ենթակա սպառնալիք: Փաստաթղթում նշվում է, որ Ռուսաստանը միջուկային զենքի կիրառման հնարավորությունը համարում է ծայրահեղ և հարկադիր միջոց։
Նախօրեին հայտնի դարձավ, որ ԱՄՆ նախագահ Ջո Բայդենը հանել է Ռուսաստանի տարածքում ATACMS մարտավարական բալիստիկ հրթիռներով հարվածելու արգելքը։ Ուկրաինայի նախագահ Վլադիմիր Զելենսկին վաղուց թույլտվություն է խնդրում արևմտյան զենքով հարվածել Ռուսաստանի խորքում գտնվող թիրախներին։
Պուտինը չի մեկնաբանել որոշումը, որիմասին Վաշինգտոնը պաշտոնապես չի հայտարարել։ Բայց նա հրամանագիր է ստորագրել միջուկային դոկտրինի վերաբերյալ։