«Կիևն առաջին հարվածն է հասցրել Ռուսաստանի խորքում գտնվող թիրախներին»․ “РБК-Украина”
- 15:30 19.11.2024
Անցած գիշեր ուկրաինական զորքերը արևմտյան արտադրության ATACMS բալիստիկ հրթիռներով առաջին հարվածներն են հասցրել Ռուսաստանի տարածքին, հաղորդում է “РБК-Украина” գործակալությունը՝ պնդելով, որ հարվածի թիրախում են եղել Բրյանսկի մարզի Կարաչյով քաղաքում գտնվող զինապահեստները։
Ուկրաինայի պաշտպանության նախարարությանը մոտ կանգնած աղբյուրների պնդմամբ, «նախանշված թիրախները հաջողությամբ խոցվել են»։
Կարաչյովը գտնվում է Ուկրաինայի հետ սահմանից 130 կիլոմետր հեռավորության վրա։
Արևմտյան լրատվամիջոցները, հղում անելով իրենց աղբյուրներին, կիրակի օրը հաղորդեցին, թե Բայդենի վարչակազմը թույլ է տվել ուկրաինացիներին ամերիկյան զենքով հարվածել Ռուսաստանի տարածքին։
Կիևն ու Վաշինգտոնը չեն հաստատել տեղեկությունները։
Մոսկվան հայտարարել է, որ «արևմտյան հրթիռներով հարվածները կդիտարկվեն որպես ՆԱՏՕ-ի հարձակում»։