Թուրքամետ ուժերը մտան Հալեպ, հայկական առաքելությունը լքեց քաղաքը

Սիրիայում թուրքամետ ուժերը վերահսկողության տակ են վերցրել մի քանի շրջաններ երկրի մեծությամբ երկրորդ քաղաքում՝ Հալեպում, հայտնում է բրիտանական մոնիթորինգային խումբը:

Սիրիական իշխանությունները շաբաթ օրը փակել են Հալեպի օդանավակայանը, ինչպես նաև քաղաք տանող բոլոր ճանապարհները, Reuters-ին հայտնել են երեք ռազմական աղբյուրներ, մինչդեռ նախագահ Բաշար ալ-Ասադի դեմ ապստամբները հայտնել են, որ հասել են Հալեպի կենտրոն:

Նրանք քաղաք են վերադառնում 2016 թվականից ի վեր առաջին անգամ, երբ Ասադը և նրա դաշնակիցները՝ Ռուսաստանը և Իրանը, հետ գրավեցին Հալեպը, իսկ ապստամբները համաձայնեցին նահանջել ամիսներ շարունակ ռմբակոծություններից և պաշարումից հետո:

2020 թվականին Թուրքիան և Ռուսաստանը համաձայնության են եկել հրադադարի մասին՝ դադարեցնելու Իդլիբը վերադարձնելու Սիրիայի կառավարության փորձերը: Սա հանգեցրեց ռազմական գործողությունների երկարատև դադարեցման: Ապստամբների հարձակումը ամենախոշոր հարձակումն է 2020 թվականի մարտից ի վեր, երբ Ռուսաստանը և Թուրքիան պայմանավորվեցին հակամարտությունը թուլացնել, նշում է Reuters-ը։

Իսրայելը եւս ուժեղացրել է իր ավիահարվածները Սիրիայի ներսում Իրանի, Հեզբոլլահի և Թեհրանի կողմից աջակցվող այլ խմբավորումների հետ կապված թիրախների վրա:

Սիրիայի Հալեպում առաքելություն իրականացնող Հայաստանի հումանիտար ականազերծման և բուժաշխատողների ողջ անձնակազմը նոյեմբերի 29-ի երեկոյան ՊՆ ռազմատրանսպորտային ինքնաթիռով վերադարձել է Հայաստան։

Պաշտպանության նախարարությունը հայտնում է, որ հաշվի առնելով տեղում ստեղծված իրավիճակը՝ որոշում է կայացվել ժամանակավորապես կասեցնել խմբի գործունեությունը Հալեպում։

Հայաստանի մասնագիտական խումբն իր առաքելությունը Սիրիայի երկրորդ խոշորագույն քաղաքում իրականացնում է 2019 թվականից։