Եթե ​​վրացական ոստիկանությունը անցնի ընդդիմության ու ժողովրդի կողմը

Վրաստանի պաշտպանության և արտաքին քաղաքականության գերատեսչությունների որոշ աշխատակիցներ դեմ են արտահայտվել Եվրամիությանն անդամակցելու բանակցությունները դադարեցնելու ռուսամետ իշխանությունների որոշմանը` հայտարարելով, որ ԵՄ-ին և ՆԱՏՕ-ին անդամակցելու ուղին երկրի անվտանգության համար այլընտրանք չունի:

Պաշտպանության նախարարությունում եվրատլանտյան ինտեգրմանը նվիրվածության մասին համատեղ հայտարարություն են ստորագրել տարբեր գերատեսչությունների աշխատակիցների 43 հոգի։

ԱԳՆ-ում 100 աշխատակիցներ ստորագրել են նմանատիպ հայտարարություն, իսկ Բուլղարիայում Վրաստանի դեսպան Օթար Բերձենիշվիլին՝ ի նշան բողոքի, հայտարարել է իր հրաժարականի մասին։ ԱԳՆ պաշտոնյաներն ընդգծել են, որ ԵՄ-ին անդամակցելու շուրջ բանակցությունների սառեցումը հակասում է երկրի սահմանադրությանը և ռազմավարական շահերին։

Սահմանադրական դատարանի որոշ աշխատակիցներ նույնպես կոչ են արել «Վրացական երազանքի» կառավարությանը վերանայել իր որոշումը, քանի որ այն անտեսում է վրաց ժողովրդի սահմանադրական կամքը։

Վրաստանում խոշոր բիզնեսը նույնպես դեմ է արտահայտվել ԵՄ-ին անդամակցելու շուրջ բանակցությունների սառեցմանը։ Խոսքը, մասնավորապես, խոշորագույն Bank of Georgia և TBC Bank բանկերի, Magticom և Silknet հեռահաղորդակցության օպերատորների, ORBI Group-ի շինարարության և զարգացման հոլդինգի և ավտոդիլերային Tegeta ընկերության մասին է, հայտնում է The Bell-ը։ Բիզնեսը ԵՄ-ի և Հյուսիսատլանտյան դաշինքի հետ ինտեգրումն անվանել է վրաց ժողովրդի բացարձակ մեծամասնության պատմական ընտրությունը։

Վրաստանի նախագահ Սալոմե Զուրաբիշվիլին հայտարարել է, որ չի լքի իր պաշտոնը այն բանից հետո, երբ Վրաստանի խորհրդարանը երկու շաբաթից նոր նախագահ կընտրի։ Վերլուծաբանները խոսում են Վրաստանում երկիշխանության մասին.

Մինչ դեռ ոստիկանական ուժերը կողմ են իշխող կուսակցությանը և արդեն 4-րդ օրն է Թբիլիսիում ցրում են բազմահազարանոց ցույցերը։ Ի՞նչ կլինի, եթե ոստիկանությունն անցնի ժողովրդի կողմը.