Փաշինյան․ մենք ընտրել ենք “ուտելիք լինելու” տարբերակը

Այսօր խորհրդարանում Նիկոլ Փաշինյանը փորձել է «ապաշխարվել» եւ վերջակետ դնել 6 տարվա իր քաղաքականության այս փուլին։ Սակայն ինչպես այլ բաները, ապաշխարումը նույնպես կեղծ էր եւ թատերական՝ ենթատեքստով։ Էլ Արցախի հարցը 9-ամսեկան հղիության հետ համեմատել, էլ հայերին «ազգ-նահատակ» անվանել, էլ բանակի նշանակության զրույացում։ Ապաշխարության տեղ ստացվեց «мы старый мир разрушили», սակայն «мы свой, мы новый мир не построим»։

Չէ, Փաշինյանը իհարկե փորձել է ձեւացնել, որ եղածը քանդելու, Արցախը հանձնելու, Հայաստանը 29,8 ք/կմ-ի մեջ խցկելու փոխարեն ինչ-որ բան է կառուցել։ Բայց այդպես էլ չասաց, արդյո՞ք արտաքին միջավայրը ջունգլիներից վերածվել է վեգանների պարտեզի, եւ Հայաստանն առանց Արցախի կարող է գոյատեւել որպես «խոտակեր» պետություն եւ հետապնդել տնտեսական շահ։ Յա, իրո՞ք։ Գայլերն անհետացել են, իսկմնացածին կարելի է խափել։

Այն քաղաքականությունը, որն ինքը վարել է և վարում է, Փաշինյանի համոզմամբ, ոչ թե ճիշտ է կամ սխալ, այլ միակ հնարավոր տարբերակն էր, որը պետություն ունենալու շանս է տալիս։

«Ես 2 տարի առաջ այս ամբիոնից հայտարարել եմ, որ եթե մեզ հաջողվի 1-2 տարի պահել մեր պետականությունը, դա նշանակում է, որ մենք առաջիկա հարյուրամյակում պետություն ունենալու իրական հնարավորություն ենք ստեղծում։ Ահա 2 տարի անց ես կանգնած եմ խորհրդանում որպես վարչապետ և պետք է արձանագրեմ, որ միջնաժամկետում մեր դարավոր և ռազմավարան խնդիրը լուծված է։ Բայց մեզ չի կարելի ոչ մի վայրկյան թուլացնել մեր զգոնությունը», – հայտարարեց Փաշինյանը։

Նա համարում է, որ «պետությունը ունի կոնկրետ տարածք, պատասխանատվության կոնկրետ գոտի և գործում է միայն ու միայն այդ տարածքի, միայն ու միայն այդ սեփական պատասխանատվության տարածքի շահերին համապատասխան։ Իսկ այդ շահը տնտեսական զարգացումն է»:

Փաշինյանի ներկայացմամբ, պետք է ստեղծել անվտանգային մի համակարգ, որի առաջին գծում բանակը չէ. «Բանակից առաջ կան բուֆերներ, որո՞նք են այդ բուֆերները, օրինակ, տնտեսական փոխկախվածությունները, որից առաջ կա ուրիշ բուֆեր՝ միջազգային կանոնները, որի ոտնահարումներից այսօր բողոքում են բոլորը»:

Այս 2 տարվա մեջ աշխարհակարգում ոչինչ չի փոխվել՝ նույն գիշատիչ բարքերը, եւ այդ պայմաններում կամ պաշտպանվում ես՝ դիվանագիտությամբ, զենքով, ազգային ղեկավարությամբ, կամ ուտելիք ես դառնում։

Փաշինյանի այսօրվա հայտարարության ենթատեքստ այն մասին է, որ հայերը իր ղեկավարությամբ ընտրել են «խժռվելու» տարբերակը։ Եթե նախկին պաշտպանության համակարգով, Արցախով, «ազգ-բանակով» չի հաջողվել դիմակայել գիշատիչներին, հիմա շանսերը գրեթե զրոյացել են։

Դա է Փաշինյանի ասացի տրամաբանությունը։