Ռուսական ռազմանավերը լքել են սիրիական Տարտուսի իրենց բազան
- 13:39 04.12.2024
BBC
Բոլոր ռազմանավերը լքել են սիրիական Տարտուսում գտնվող ռուսական ռազմածովային բազան։ Դատելով «Planet Labs»-ի արբանյակային պատկերներից, որոնք ուսումնասիրել է BBC-ի ռուսական ծառայությունը, նրանք այնտեղ են եղել երկու օր առաջ։
Պաշտոնապես այս օբյեկտը կոչվում է Սիրիայում ռուսական նավատորմի նյութատեխնիկական ապահովման կետ. ռուս զինվորականները պնդում են, որ դա լիարժեք ռազմաբազա չէ:
Սիրիայում ՌԴ ռազմածովային ուժերի նյութատեխնիկական ապահովման կետը կարևոր է առաջին հերթին այն պատճառով, որ դա Միջերկրական ծովում Ռուսաստանի միակ ռազմածովային օբյեկտն է։
Նրա արժեքն աճել է 2022 թվականին՝ Ուկրաինա ռուսական ներխուժումից հետո։
Այժմ ռուսական նավատորմը չի կարող իր նավերը ուղարկել Սև ծով, քանի որ Թուրքիան պատերազմի պատճառով փակել է նեղուցները ռազմանավերի համար։
Մեկ այլ կարևոր օբյեկտ է Խմեյմիմ ավիաբազան։
Ռազմական փորձագետները նշում են, որ Տարտուսից նավերի և օժանդակ նավերի դուրսբերումը կարող է նշանակել, որ ռուսական հրամանատարությունը վստահ չէ դրանց անվտանգությունն ապահովելու ունակության մեջ։