Առաջին քայլը կարող է լինել ԵԱՀԿ Մինսկի խմբի մանդատի վերակենդանացումը եւ իրագործումը

Դեկտեմբերի 5-6-ին Վալետայում (Մալթա) կկայանա ԵԱՀԿ արտաքին գործերի նախարարների խորհրդի 31-րդ նիստը։ Նիստն անցկացվում է յուրաքանչյուր տարվա դեկտեմբերի առաջին շաբաթվա ընթացքում։ 

ԱՄՆ պետքարտուղար Էնթոնի Բլինքենը, ինչպես նաև ԵԱՀԿ անդամ 57 երկրների արտգործնախարարներ, բարձրաստիճան ներկայացուցիչներ կմասնակցեն նիստին։ 

ԵԱՀԿ-ն՝ միջազգային միակ կազմակերպությունն է, որը լեգիտիմ մանդատ ունի Ղարաբաղյան խնդրի լուծման ճանապարհներ որոնելու համար։ Չնայած Բաքվի եւ Մոսկվայի ջանքերին եւ Հայաստանի կրավորական լռությանը, ԵԱՀԿ Մինսկի խմբի մանդատը պահպանվում է եւ կարող է աշխարհակարգի համար փրկօղակ լինել։

2020-2023 թվականին Արցախում կատարված ահաբեկչական պատերազմը, շրջափակումը, օկուպացիան, 150 հազ․ բնիկ բնակչության տեղահանությունը հիմնովին խաթարել է ԵԱՀԿ պատասխանատվության գոտու անվտանգության համակարգը։

Այդ համակարգի փլուզման ճաքերը հասել են աշխարհի բոլոր կետեր՝ Ուկրաինան արդեն խոսում է տարածքներ զիջելու մասին, Գերմանիայում եւ Ֆրանսիայում կառավարական ճգնաժամ է, ԱՄՆ-ում իշխանության են եկել ռադիկալ ուժեր, Վրաստանում եւ կից Աբխազիայում սահմանադրական կազուս է, Ռուսաստանը տնտեսական քայքայման եզրին է, Մերձավոր Արեւելքում գիշատիչները վերաբաժանում են սկսել, Հարավային Կորեյաի նախագահը ռազմական դրություն է հայտարարում, հետո չեղարկում։

Այս մեծ խաթարումը տեղի է ունեցել փոքր Արցախում միջազգային բոլոր նորմերն ու իրավունքները խախտելու “կոնսենսուսի” պատճառով։ ԵԱՀԿ-ն եւ կազմակերպության “գրանդ”-անդամները թույլ են տվել ռուս-թուրք-իսրաելական հանցավոր համաձայնություն Արցախում, ջախջախելով այն հենասյուները, որոնց վրա ներկայիս աշխարհակարգն է կառուցված։

Դեռ շատ պետություններ են փլվելու, եթե միջազգային իրավունքը չվերականգնվի։ Իսկ դրա առաջին քայլը կարող է լինել ԵԱՀԿ Մինսկի խմբի մանդատի վերակենդանացումը եւ իրագործումը։ Դրան պետք է նախորդեն ռուս-թուրքական հանցավոր համաձայնությունների եւ ահաբեկչական պատերզմի արդյունքների չեղարկումը։

Այլապես Արցախը կմնա աշխարհի կենտրոնում, իսկ տասնյակ պետություններ կդադարեն գոյություն ունենալ։