Զելենսկի. Կիևն ի վիճակի չէ վերադարձնելու Ղրիմն ու Դոնբասը

DW

Ուկրաինայի նախագահ Վլադիմիր Զելենսկին հայտարարել է, որ ուկրաինական բանակը չի կարող ինքնուրույն վերադարձնել Ղրիմն ու Դոնբասը։ Այս մասին նա ասել է ֆրանսիական Le Parisien թերթին տված հարցազրույցում, որը հրապարակվել է երեքշաբթի՝ դեկտեմբերի 17-ին։

Հրատարակությունը Զելենսկիին հարցրել է, թե ինչ փոխզիջումների է նա պատրաստ գնալ պատերազմին վերջ տալու համար։ «Պատրա՞ստ եք գոնե ժամանակավորապես հրաժարվել Ղրիմից կամ Դոնբասից»,  հարցրեց լրագրողը։ Զելենսկին պատասխանել է. «Մենք չենք կարող զիջել մեր տարածքները։ Ուկրաինայի Սահմանադրությունը մեզ արգելում է դա անել։ Դե ֆակտո այս տարածքներն այժմ վերահսկվում են ռուսների կողմից։ Մենք ուժ չունենք նրանց հետ բերելու։ Մենք կարող ենք հույս դնել միայն միջազգային հանրության դիվանագիտական ​​ճնշման վրա՝ Պուտինին ստիպելու բանակցային սեղանի շուրջ նստել»:

Զելենսկիին հարցրել են՝ պատրա՞ստ է արդյոք բանակցությունների սեղանի շուրջ նստել ՌԴ նախագահ Վլադիմիր Պուտինի հետ։ Նա պատասխանեց. «Կարևորը այն չէ, թե ով է նստած դիմացը։ Կարևոր է, թե ինչ վիճակում ես բանակցում: Չեմ կարծում, որ մենք թույլ դիրքերում ենք, բայց ուժեղ դիրքերում էլ չենք. Կլինե՞նք ՆԱՏՕ-ում։ Մենք չգիտենք։ Կլինե՞նք արդյոք Եվրամիության մաս։ Այո, ապագայում, բայց ե՞րբ”:

«Նման պայմաններում Պուտինի հետ բանակցությունների սեղանի շուրջ նստելը կնշանակի նրան իրավունք տալ որոշել ամեն ինչ աշխարհի մեր երկրամասում։ Սկզբում մենք պետք է մշակենք մոդել, գործողությունների ծրագիր կամ խաղաղության ծրագիր՝ ինչպես ուզում եք անվանեք այն: Այդ ժամանակ մենք կկարողանանք դա ներկայացնել Պուտինին կամ, ավելի լայն, ռուսներին»,- ասել է Զելենսկին։ Միևնույն ժամանակ նա ընդգծել է, որ ոչ մի համաշխարհային առաջնորդ «իրավունք չունի Պուտինի հետ բանակցել առանց Ուկրաինայի»։ «Մենք այս մանդատը ոչ մեկին չենք պատվիրակել։ Մենք զոհեր ենք»,- ասել է Զելենսկին։