Լիաննա Պետրոսյանին ընդունել են ԱՄՆ դեսպանատանը, խոսել են արցախցիների խնդիրներից
- 22:01 18.12.2024
Lianna Petrosyan-ը գրում է․
Դեկտեմբերի 17-ին տեղի է ունեցել հանդիպում ՀՀ-ում ԱՄՆ դեսպանատան քաղաքական և տնտեսական բաժնի ղեկավարի տեղակալ Ջեֆրի Ուորների հետ, որի ընթացքում իմ կողմից մանրամասն անդրադարձ է կատարվել Արցախից բռնի տեղահանված հայրենակիցների իրավական, սոցիալ-տնտեսական և քաղաքական խնդիրներին։
Հանդիպման ժամանակ ներկայացրել եմ ՀՀ Կառավարության կողմից իրականացվող աջակցության ծրագրերի վերաբերյալ տեղահանված հայրենակիցների ունեցած մտահոգություններն ու դժգոհությունները՝ և դրանով պայմանավորված վերջին հանդիպումները ՀՀ Կառավարության անդամների և ներկայացուցիչների հետ:
Քննարկվել են նաև Արցախից բռնի տեղահանված հայրենակիցների միջազգային իրավուքների պաշտպանության և իրացման, գերիների և պատանդառված անձանց վերադարձի և միջազգային պաշպանության, անհայտ կորած անձանց մասին տեղեկությունների բացակայության մասին, Արցախում հոգևոր, մշակութային արժեքների և գերեզմանների պահպանման հարցեր, 070 կոդով անձնագրով մուտքի վիզայի տրամադրման խնդիրները, ուսանողների համար կրթաթոշակների և փոխանակման ծրագրերի հնարավորությունները։
Հանդիպման արդյունքում պայմանավորվածություն է ձեռք բերվել շարունակել կապը և քննարկումները։