«Մենք Աբխազիային մաղթում ենք բարգավաճում: Բնականաբար, մեզ հետ միասին». Պեսկով

Ռուսաստանը դեկտեմբերի 23-ից կսկսի էլեկտրաէներգիայի հումանիտար մատակարարումները Աբխազիա, հաղորդում է Interfax-ը՝ հղում կատարելով Աբխազիայի նախագահ Բադրա Գունբային։

«Ի պատասխան Աբխազիայի կոչի՝ Ռուսաստանի ղեկավարությունը ևս մեկ անգամ մեզ օգնության ձեռք մեկնեց և սկսում է էլեկտրաէներգիայի մարդասիրական մատակարարումներ իրականացնել հանրապետություն։ <…> Աբխազիայի ժողովրդի անունից իմ անկեղծ երախտագիտությունն եմ հայտնում Ռուսաստանի ղեկավարությանը և ողջ եղբայրական ռուս ժողովրդին օգնության համար»,- ասել է նա։

Նախօրեին Գունբան Ռուսաստանից հումանիտար էլեկտրաէներգիայի մատակարարումներ է խնդրել։ Նա նշել է, որ օրական 9-11 ժամանոց հոսանքազրկումները «վտանգում են մեր երեխաների, տարեցների և բնակչության սոցիալապես անապահով խավերի կյանքն ու առողջությունը»։

Կրեմլը հայտարարեց, որ անպայման կպատասխանի Աբխազիայի խնդրանքին։ «Մաղթում ենք նրանց կայունություն, բարգավաճում և երջանկություն։ Բնականաբար, մեզ հետ միասին»,- հավելել է ՌԴ նախագահի մամուլի քարտուղար Դմիտրի Պեսկովը։

Հիշեցնենք, որ Ռուսաստանը դադարեցրեց էլեկտրաէներգիա մատակարարել Աբխազիա այն բանից հետո, երբ այնտեղ բողոքի ցույցեր սկսվեցին Ռուսաստանի հետ ներդրումային համաձայնագրի վավերացման դեմ։ Բողոքի ցույցերը հանգեցրին Աբխազիայում իշխանափոխության, ընտրությունները նշանակված են փետրվարին, սակայն, ըստ ամենայնի, Ռուսաստանը աննկատ կկլանի Աբխազիան։