Ֆինանսների նախարար․ փողը կտրեք, թող արցախցիները փողոցում մնան
- 12:47 25.12.2024
Ֆինանսների նախարար Վահե Հովհաննիսյանն այսօր հրավիրած ասուլիսում անդրադարձավ արցախցիների բնակապահովման ծրագրին։
Հայտնի է, որ այս ծրագրից օգտվելու ցանկություն ունեցող արցախցիների թիվը մեծ չէ։ Ֆինանսների նախարարը դա բացատրում է նրանով, որ ՀՀ կառավարությունը արցախցիներին ՀՀ պետական բյուջեից սոցիալական աջակցության «բավական լավ փաթեթ» է հատկացնում, այդ պատճառով արցախցիները չեն ցանկանում օգտվել բնակապահովման ծրագրից։
«Լեռնային Ղարաբաղից բռնի տեղահանվածների համար միջոցները նախատեսված են բյուջեում, այսինքն՝ հուսով ենք որ պահուստային ֆոնդից հավելյալ գումար տալու կարիք չի լինելու։ Ծրագիրը հիմա էլ մեկնարկած է, ուղղակի կարծում եմ՝ քանի որ մենք բավականին լավ փաթեթ ենք տրամադրում մարդկանց՝ ամենամսյա իրենց կարիքները հոգալու համար, մոտիվացիան մեծ չէ՝ այդ ծրագրից օգտվելու համար։ Եվ կարծում եմ, որ երբ այս աջակցությունն ավարտվի, որը նախանշված է մինչեւ մարտ ամիսը, այդ ժամանակ արդեն քաղաքացիներն ավելի ակտիվ կդիմեն այդ բնակարանները ձեռք բերելու համար»,- ասաց նախարարը։
Նախարարի ընտանիքին մաղթում ենք, որ արցախցիների պես “բավարարվեն” ամիսը 50 հազար դրամով, տուն չունենան եւ տան կարիք չզգան։ Ամոթը Հայաստանում վաղուց գոյություն չունի։