Բայդենի հեռացող վարչակազմը պատրաստ է աշխատել Երևանի ու Բաքվի հետ ցանկացած ձևաչափով
- 13:56 03.01.2025
Վաշինգտոնը պատրաստ է աշխատել Երևանի ու Բաքվի հետ ցանկացած ձևաչափով, որը կարող է կողմերի համար առաջընթաց ապահովել, «Ամերիկայի ձայն»-ի հայկական ծառայության հարցմանն ի պատասխան հայտարարել են ԱՄՆ պետդեպարտամենտից։
«Միացյալ Նահանգների կառավարությունն աջակցում է Հայաստանի և Ադրբեջանի ջանքերին՝ հասնելու կայուն և արժանապատիվ խաղաղության համաձայնագրի, որն էական նշանակություն ունի անվտանգ և բարգավաճ Հարավային Կովկասի համար», – հայտնել են Պետդեպարտամենտից։
Մի քանի օրից Բայդենի վարչակազմն, այդ թվում պետքարտուղար Բլինքենը կավարտեն պաշտոնավարումը։ Այդ վարչակազմի ներկայացուցիչը 2023-ի սեպտեմբերի 17-ին մասնակցեց Պոլսում կայացած ՌԴ եւ ԵՄ-ի հետ համատեղ գաղտնաժողովին, որտեղ որոշում ընդունվեց Արցախը օկուպացնելու եւ հայաթափելու մասին։
Մինչ այդ Բլինքենի տեղակալ Յուրի Քիմը Կոնգրեսում հայտարարում էր, որ չեն թույլատրի Արցախի հանդեպ ագրեսիա։ Իսկ դրանից առաջ ՀՀ-ում ԱՄՆ դեսպան Քվինը հնարավոր է հանարել Արցախի հայերին “երջանիկ ընտանեական կյանքով” ապրելը Ադրբեջանի կազմում։
Իրականությունը այլ կերպ ստացվեց, եւ ցեղասպանությունից եւ Արցախի բնիկ բնակչության տեղահանումից հետո Հայաստան եկավ USAID տնօրեն Սամանթա Փաուերը, որը արցախցի կանանց հետ ժենգյալով հաց թխեց։
Բայդենի վարչակազմն այդպես էլ գնահատական չտվեց 2023-ի սեպտեմբերյան իրադարձություններին։ Չնայած, որ միջազգային խոշոր իրավապաշտպան կազմակերպությունները Պետդեպի պատվերով զեկույց են պատրաստել “Ինչու Լեռնային Ղարաբաղում հայեր չկան” թեմայով, կատարվածը էթնիկ զտում անվանելով, Պետդեպը այդպես էլ չգնահատեց կատարվածը որպես էթնիկ զտում։ Պետդեպը փորձեց Միրզոյան-Բայրավով հանդիպումների միջոցով միջնորդ դառնալ, բայց անհաջող։ Եւ դժվար թե մինչեւ հունվարի 20-ը Բայդենի վարչկազմը որեւէ բան անի Արցախի խնդրի հետ կապված։
Ինչպիսի՞ն կլինի Թրամփի վարչակազմի եւ դրա հնարավոր պետքարտուղար Մարկո Ռուբիոյի քաղաքականությունը Հայաստանի, այդ թվում Արցախի հանդեպ։ Բայդենի վարչակազմը այդպես էլ բացահայտ կոչ չարեց Հայաստանին փոխել Սահմանադրությունը եւ հանել այնտեղից ՀՀ եւ Արցախի վերամիավորման մասին դրույթը։ Ինչի՞ց կսկսի Թրամփը։
Նաիրա Հայրումյան