Էսկալացիայի ուրվականը սավառնում է Հայաստանի վրա, իսկ քաղաքական ուժերը տեսլական չունեն
- 13:34 09.01.2025
Ալիեւի վերջին ագրեսիվ հայտարարությունը ստիպել է Հայաստանի իշխանությանը որոշակի տեսակետներ հայտնել ապագայի վերաբերյալ։
Մասնավորապես, Փաշինյանի՝ «Արմենպրես»-ին տված անգույն հարցազրույցի ֆոնին, որտեղ նա միայն առաջարկում էր ճանապարհ բացել Նախիջևանով, ԱԳ նախարար Արարատ Միրզոյանը երեկվա ասուլիսի ժամանակ մի քանի կարևոր հայտարարություն արեց։
Նախ, նա ասաց, որ Երևանը կողմ է Հայաստանում ԵՄ առաքելության երկարաձգմանը, ինչը որոշակի գործոն է էսկալացիայի կանխման համար։ Ինչպես հայտնի է, ԵՄ առաքելության դուրս գալը Ալիևի «պայմանն» է, և Երևանը հայտարարում է, որ մտադիր չէ կատարել այդ պայմանը։
Երկրորդ՝ Միրզոյանը նշեց, որ Գյումրիում ռուսական բազայի դուրս բերելու մասին խոսք չկա, թեև Հայաստանի սահմանների պաշտպանությունն աստիճանաբար ռուսական սահմանապահ զորքերից կփոխանցվի Հայաստանի սահմանապահ զորքերին։ Ըստ երևույթին, սա պատասխան է Մոսկվային, որը փորձում է Երևանի «հակառուսական» մտադրությունները ներկայացնել որպես Բաքվին աջակցելու պատճառ։
Երրորդ՝ Միրզոյանն ասաց, որ Հայաստանը չի ենթարկվի սադրանքին և հակամեղադրանքներ չի հնչեցնի Բաքվի հասցեին՝ հիշատակելով սակայն Բաքվից և Սումգայիթից 500 հազար փախստականների մասին։ Բայց Երևանը չի էլ հանձնվի, ասաց Միրզոյանը՝ ըստ էության ակնարկելով, որ Հայաստանը չի կատարի Ալիևի պայմանները։
«Ալիևի պայմանները» հասել են բեկման կետին. փաստորեն, Բաքվի բերանով աշխարհի «շնաձկները», ինչպես ասաց Միրզոյանը, պահանջում են հայկական պետության կամավոր լուծարում և բանակի զինաթափում, ինչպես դա եղավ Արցախում։ Վերլուծաբանները այն ժամանակ զգուշացրել են, որ Երևանի հրաժարումը Արցախից նախերգանք կլինի հայկական պետականության փլուզման համար։
Այդ ընթացքում ԵՄ-ի և Իրանի բարձրաստիճան ներկայացուցիչները շտապ ժամանել են Բաքու, ապա մեկնել Երևան։ Վերլուծաբանները դա պայմանավորում են Ալիևի ագրեսիվ հայտարարություններով և ուժային լոծումների սպառնալիքով։ Բացի այդ, Էրդողանը զանգահարել է Ալիևին և կրկին հայտարարել Ադրբեջանին «Կովկասում խաղաղություն հաստատելու» հարցում իր օժանդակության մասին։
Ավելի վաղ Ֆրանսիայի նախագահ Մակրոնը հայտարարել էր, որ Ռուսաստանը դավաճանել է իր դաշնակից Հայաստանին Ղարաբաղում։ Մոսկվան դեռ չի հայտարարել, որ թուրքական էքսպանսիայի դեպքում պայքարելու է «ինքնիշխան» Հայաստանի համար։
Հայաստանում իշխանության ընդդիմախոսներն ասում են, որ Փաշինյանը պլան Բ չունի այն դեպքի համար, եթե Ալիևը ռազմական գործողություններ սկսի, իսկ Էրդողանը օգնի նրան։ Միևնույն ժամանակ, քաղաքական ուժերը չեն ներկայացնում իրենց սեփական պլան «բ»-ն։
Էսկալացիայի և աղետի ուրվականը սավառնում է Հայաստանի վրա, իսկ քաղաքական ուժերը չեն խոսում Հայաստանի հավանական քայլերի իրենց տեսլականի մասին։ Կան միայն ազգային համաձայնության կառավարություն ստեղծելու կոչեր, մինչդեռ ներկայիս իշխանությունը մինչ օրս չի հայտարարել, որ կարող է ընդունել իր քաղաքականության ձախողումը և հրաժարական տալ։
Նաիրա Հայրումյան