Ինչ պայմանագիր է ստորագրելու Հայաստանը ԱՄՆ հեռացող վարչակազմի հետ

Հունվարի 14-ից 15-ը Հայաստանի ԱԳ նախարար Արարատ Միրզոյանն աշխատանքային այցով կգտնվի Վաշինգտոնում:

Ըստ Հայաստանի ԱԳՆ հաղորդագրության՝ նախատեսված են հանդիպումներ ԱՄՆ գործընկերների, այդ թվում՝ ԱՄՆ պետքարտուղար Էնթոնի Բլինքենի հետ:

«Տարվա ընթացքում ՀՀ-ԱՄՆ փոխգործակցությունն ակտիվ է եղել տարբեր մակարդակներում և հարթակներում՝ ներառյալ նախարար Միրզոյանի և պետքարտուղար Բլինքենի երկկողմ հանդիպումների ձևաչափով», – նշված է հաղորդագրությունում:

«Հանուն հանրապետության» կուսակցության ղեկավար Արման Բաբաջանյանը “Ազատության” հետ հարցազրույցում պնդում է, որ խոսքը գնում է հայ-ամերիկյան ռազմավարական գործընկերության հնարավոր համաձայնագրի մասին։

«Այն, ինչ մեկնարկել էր նախորդ տարի հունիս ամսին, երբ ազդարարվեց մեկ մակարդակով բարձրացնելու վերաբերյալ մեր հարաբերությունների խորությունը, փաստաթղթի ստորագրման ամերիկյան մասը տեղի կունենա Վաշինգտոնում», – հայտնեց Արման Բաբաջանյանը։

Վաշինգտոնն «այս պահին դիտարկելու կամ հայտարարելու որևէ բան չունի» Հայաստանի հետ ռազմավարական գործընկերության մասին փաստաթղթի ստորագրման վերաբերյալ, հունվարի 9-ին հայտարարել էին ԱՄՆ պետքարտուղարությունից։

Ըստ Բաբաջանյանի՝ ամենակարևորը այս պահին քննարկումն է, թե որքանով կարող է հաջորդ ադմինիստրացիայի համար այս փաստաթուղթը շարունակելի լինել։

Հիշեցնենք, որ հունվարի 20-ին նախագահ Թրամփը կստանձնի երկրի կառավարումը։