«Հայաստան-Վրաստան ճանապարհի որեւէ հատվածի հանձնում ադրբեջանական կողմին կա՞, թե՞ չկա»

Ազգային ժողով-կառավարություն հարց ու պատասխանի ժամանակ պատգամավոր Գառնիկ Դանիելյանը հարցրեց․ «Հայաստան-Վրաստան ճանապարհի որեւէ հատվածի հանձնում ադրբեջանական կողմին կա՞, թե՞ չկա»։

Փոխվարչապետ Մհեր Գրիգորյանն ի պատասսխան ասաց․ «Մենք մեր աշխատանքերի արդյունքում ձեռք բերած պայմանավորվածությունները հրապարակում ենք պարտադիր։ Եվ այդ շրջանակից, համաձյան մեր աշխատակարգի, դուրս չենք գալիս։ Մենք ունենք հաստատված կանոնակարգ, որը հստակ նկարագրում է, թե ինչպես են կայացվում որոշումները, եւ ինչպես են դրանք մտնում ուժի մեջ։ Այս շրջանակներում դուք կարող եք գտնել ձեր պատասխանները»։

Գառնիկ Դանիելյանն ասաց, որ կոնկրետ հարց է տալիս՝ ակնկալելով կոնկրետ պատասխան։ «Նորից եմ կրկնում՝ Կիրանց-Ոսկեպար ճանապարհահատվածում Հայաստան-Վրաստան ճանապարհն անցնելո՞ւ է Ադրբեջանի վերահսկողության տակ, թե՞ չէ»,- հարցը կրկնեց Գառնիկ Դանիելյանը։

Մհեր Գրիգորյանն ասաց, որ պայմանավորվածությունների շրջանակները հրապարակվում են եւ չեն կարող գաղտնի մնալ։ «Պայմանավորվածությունները հրապարակվում են եւ չեն կարող գաղտնի մնալ։ Վերջին հանդիպման վերաբերյալ կա մամլո հաղորդագրություն, որտեղ արտացոլված է, թե ինչ ենք մենք պայմանավորվել։ Եվ եթե ձեր ասածը այդ պայմանավորվածության մեջ չկա, ուրմեն չկա նման պայմանավորվածություն»,- ասաց Մհեր Գրիգորյանը։