«Խաղաղության պայմանագիրը» «պաուզա»-ի վրա են դրել

Մենք Ադրբեջանի հետ երկար ու քրտնաջան աշխատել ենք խաղաղության պայմանագրի տեքստի վրա, 17 հոդվածներից 15-ը համաձայնեցված են: Այս մասին հունվարի 23-ին Երևանում Բալթյան և Հյուսիսային Եվրոպայի երկրների խորհրդարանների ղեկավարների մասնակցությամբ «Միասին հանուն խաղաղության և ժողովրդավարության» թեմայով պանելային քննարկման ժամանակ ասաց Հայաստանի արտաքին գործերի նախարար Արարատ Միրզոյանը։

Ըստ նրա՝ մնացած երկու հոդվածների համաձայնեցումը կարող է երկար ժամանակ պահանջել, սակայն լուծումը երկու կողմից անհրաժեշտ քաղաքական կամքի դրսևորման մեջ է, և այս դեպքում շատ կարճ ժամանակում հնարավոր կլինի համաձայնեցնել տեքստը։

Միրզոյանը ցավով նշեց, որ «հարևանների կողմից» կառուցողական դիրքորոշումն ու պատրաստակամությունը չի տեսնում։

Նախարարը, փաստորեն, հերքեց այն «տրամադրությունը», որ «խաղաղության պայմանագրի» ստորագրումից 5 րոպե է պակաս ։ Դոնալդ Թրամփի երդմնակալությունից հետո շատ գործընթացներ դադարեցվեցին։ Ըստ ամենայնի, «խաղաղ գործընթացը», որը ընթանում է Երևանի և Բաքվի միջև, եւս “պաուզայի” վրա է դրվել։