Ֆրանսիան նույնպե՞ս հրաժարվում է ԵԱՀԿ Մինսկի խմբից
- 16:00 27.01.2025
Հունվարի 27-ին ՀՀ ԱԽ քարտուղար Արմեն Գրիգորյանն ընդունել է Ֆրանսիայի Հանրապետության Եվրոպայի և արտաքին գործերի նախարարության Մայրցամաքային Եվրոպայի վարչության պետ Բրիս Ռոքֆոյին:
Բրիս Ռոքֆոն ԵԱՀԿ Մինսկի խմբի համանախագահ է նշանակվել Ֆրանսիայից 2021 թվականին, և նրան պաշտոնանկ անելու մասին հրամանագիր կարծես չի եղել։
Հիմա, երբ Նիկոլ Փաշինյանը հայտարարել է, որ Բաքվի հետ միասին պատրաստ է դիմելու ԵԱՀԿ-ին՝ Մինսկի խմբի մանդատը չեղարկելու խնդրանքով, Բրիս Ռոքֆոյի այցը Հայաստան խոսում է Փարիզի մտադրության մասին՝ հասկանալու, թե ինչ է ուզում Երևանը։
Ի դեպ, Մինսկի խմբի վերջին ամերիկացի համանախագահ Լուի Բոնոն Թրամփի նոր վարչակազմում վերջերս նշանակվեց ԱՄՆ Պետդեպարտամենտի Եվրոպայի և Եվրասիայի բյուրոյի ղեկավար։ Անհայտ է՝ նա պահպանո՞ւմ է Մինսկի խմբի համանախագահի լիազորությունները, թե՞ ոչ։
Անվտանգության խորհրդի գրասենյակից նշվել է, որ հանդիպմանը շոշափվել են «Հայաստանի և Ֆրանսիայի համար փոխադարձ հետաքրքրություն ներկայացնող հարցերի լայն շրջանակ, և զրուցակիցները մտքեր են փոխանակել տարածաշրջանային և միջազգային արդի հարցերի շուրջ»։
Արդյո՞ք Բրիս Ռոքֆոն Հայաստան է ժամանել որպես Մինսկի խմբի համանախագահ՝ Հայաստանի կառավարությանը համոզելու չգնալ հապճեպ քայլի և չհրաժարվել միջազգային ձևաչափից։ Ֆրանսիայի վերջին հայտարարությունները Արցախի վերաբերյալ ոչնչով չէին տարբերվում մյուս հայտարարություններից՝ նույն Ալմա-Աթայի հռչակագիր, նույն խորհրդային սահմաններ։ Միայն թերեւս ավելի ըմբռնող վերաբերմունք արցախցիների ու նրաց քաղաքական իրավունքների նկատմամբ։ Բայց դա պատճառ չէ պահպանել Մինսկի խումբը։
Այսպիսով, Բրիս Ռոքֆորի ժամանումը կարող է նախորդել Երևանի և Բաքվի՝ ԵԱՀԿ-ին Մինսկի խումբը փակելու կոչին։