Միրզոյան․ “Մենք եւս Ադրբեջանի հետ տեսնում ենք որոշակի պարզեցված ընթացակարգեր”
- 11:23 30.01.2025
Ապաշրջափակման դեպքում Ադրբեջանի հետ տեսնում ենք որոշակի պարզեցված ընթացակարգեր, որոնք կարող են կիրառվել»,- այս մասին այսօր Վրաստանի ԱԳ նախարարի հետ ճեպազրույցում ասաց ՀՀ ԱԳ նախարար Արարատ Միրզոյանը։
«Նոր բան չկա, ՀՀ դիրքորոշումը վաղուց հանրահռչակված է՝ մենք աջակցում ենք տրանսպորտային ենթակառուցվածքների ապաշրջափակման գաղափարին, մենք ինքներս բավականին կառուցողական առաջարկներ ենք մտածել եւ արել Ադրբեջանին։ Եվ ակնկալում ենք նաեւ Ադրբեջանի դրական վերաբերմունքը։
Մենք վստահ ենք, որ այն պայմաններով եւ ձեւով, որով մենք տեսնում ենք այդ ապաշրջափակումը, իրականում այդ ապաշրջափակումը մեծ տնտեսական օգուտներ կբերի Հարավային Կովկասի ողջ տարածաշրջանին։ Հիմնարար սկզբունքներ կան՝ երկրների տարածքային ամբողջականությունը, սուվերենությունը ենթակառուցվածքների նկատմամբ։
Բնականաբար նաեւ հասկանալով, որ 21-րդ դարը պարզեցումների, լոգիստիկ անցումների հեշտացումների դար է, եւ բոլորը բոլորի հետ փորձում են հասնել ինչ-որ պարզությունների, մենք եւս Ադրբեջանի հետ տեսնում ենք որոշակի պարզեցված ընթացակարգեր, որոնք կարող են կիրառվել»,- ասաց Միրզոյանը։
Նշենք, որ ՀՀ տարածքով միջանցքի հարցը Ալիեւը պարբերաբար բարձրացնում է, օրերս դարձյալ ասել էր, որ «ադրբեջանական բեռներն այդ ճանապարհով պետք է անցնեն առանց ստուգումների եւ պարզեցված ընթացակարգով»։