Թրամփի վարչակազմը մերձավորարևելյան երկրների հետ քննարկում է Գազայից ավելի քան 1 միլիոն պաղեստինցիների բռնի տեղահանման և նրանց համար նոր բնակարաններ կառուցելու հեռանկարը։ Այս մասին լրագրողներին հայտնել է ինքը՝ ԱՄՆ նախագահը։ Նրա խոսքով՝ այս հարցն արդեն բարձրացվել էր Հորդանանի թագավոր Աբդալլահ II-ի հետ զրույցում։ Նույնը շուտով կառաջարկվի Եգիպտոսի նախագահ Աբդել Ֆաթահ ալ Սիսիին։

«Այնտեղ (Գազայի հատվածում) բառացիորեն ամեն ինչ ավերված է, գրեթե ամեն ինչ ավերված է, և այնտեղ մարդիկ են մահանում։ Ես կփորձեի աշխատել որոշ արաբական երկրների հետ և այլուր բնակարաններ կառուցել»,- նշել է Սպիտակ տան ղեկավարը։ Լրագրողները խնդրեցին ճշտել՝ սա ժամանակավոր վերաբնակեցո՞ւմ է, թե՞ երկարաժամկետ տարբերակ։ «Երկու տարբերակներն էլ հնարավոր են։ Մենք խոսում ենք ինչպես ժամանակավոր, այնպես էլ երկարաժամկետ մասին»,- պարզաբանել է Թրամփը։

«76 տարի անց, որի ընթացքում Գազայի բնակիչների մեծ մասը բռնի պահվել է դժվարին պայմաններում՝ Իսրայել պետությունը կործանելու հույսը պահպանելու համար, հիանալի գաղափար է առաջացել՝ օգնելու նրանց գտնել մի տեղ նոր ու ավելի լավ կյանք սկսելու համար», – ասել է Իսրայելի ֆինանսների նախարար Բեզալել Սմոտրիչը։

Իրանի արտաքին գործերի նախարար Աբբաս Արաղչին առաջարկել է իսրայելցիներին տեղափոխել Գրենլանդիա՝ ի պատասխան ԱՄՆ նախագահ Դոնալդ Թրամփի՝ Գազայի հատվածից պաղեստինցիներին հարևան արաբական երկրներ տեղափոխելու առաջարկին։ Sky News-ին տված հարցազրույցում Արաղչին ծաղրել է Թրամփի առաջարկը, որը վրդովմունք է առաջացրել ողջ տարածաշրջանում:

Արցախցիների տեղահանությունը փորձաքար է դարձել հակամարտությունների «կարգավորման» համար. չկա ժողովուրդ՝ չկա հակամարտություն, կարծում են նրանք, ովքեր իրենց մեսիա են երեւակայում և իրավունք վերապահում ամբողջ ժողովուրդների ճակատագիրը որոշելու։ Բայց եթե Արցախի ժողովուրդը մենակ մնաց 2023 թվականի սեպտեմբերի 17-ի «կոնսենսուսի» դեմ, ապա մյուս ժողովուրդներն ավելի պարկեշտ դաշնակիցներ ունեն։

«Եթե ժողովուրդը ոտքի կանգնի, մենք բանակի երբեմնի փառքը վերականգնելու ենք, եւ բանակը դեռ իր հուժկու հարվածը տալու է մեր հայրենիքի պաշտպանության ու ամենակարեւոր խնդիրները կատարելու համար»,- այս մասին Եռաբլուրում լրագրողների հետ ճեպազրույցում ասաց պաշտպանության նախկին նախարար Սեյրան Օհանյանը։

Նա ասաց, որ կեղծ օրակարգ է այն հակասությունները, որոնք այսօրվա իշխանությունները դնում են մեր պատմության հարցում, ուրանում են Ցեղասպանությունը, որն իրականացվել է հայ ժողովրդի նկատմամբ։ «Երբեւիցե Արարատի ու Արագածի, մեր պատմության ու մեր այսօրվա իրականության միջեւ հակասություն չի եղել։ Մեր պատմությունն է, որ հիմք է ստեղծել, որպեսզի մենք մեր նորօրյա պատմության ընթացքում ունենանք ձեռբերումներ։ Այսօրվա բանակը չափազանց երիտասարդ բանակ է, բայց բանակի կազմավորման ակունքներում մեր դարավոր պայքարի ոգին է, մեր ֆիդայինների ըմբոստ կեցվածքն է, մեր ռազմական գործիչների ռազմավարական միտքն է։ Ի վերջո, Ղարաբաղյան շարժման ժամանակ մեր մտավորականների ու կամավորականների կուռ համադրված գործողությունները հիմք հանդիսացան տարբեր ջոկատներից ու ստորաբաժանումներից ձեւավորել կանոնավոր բանակ։ Մենք մեր պատմությունը հիմք ընդունելով՝ միշտ ձեւավորել ենք այն առօրյան, որը ինքներս ենք կերտել։ Այսօր այսպիսի կեղծ թեզեր են դաշտ նետում, որ մենք չենք արել, մեր փոխարեն են բանակը կառուցել, մեր փոխարեն ռուսներն են կռվել, այդպիսի բան չկա։ Իրական մարտական գործողությունների մեջ եղել է հայ մարտիկը, գետինը վրա հայկական բանակը կառուցել է հայ ժողովուրդը»,- ասաց Օհանյանը։

Անդրադառնալով Փաշինյանի այն հայտարարությանը, որ եթե Արարատի խոսույթով զենք գնենք, մեզ ժանգոտված զենքեր կվաճառեն, Օհանյանն ասաց․ «Մենք երբեւիցե ժանգոտած, անպիտան զենք չենք գնել։ Մենք երբեւիցե չենք ունեցել սպառազինություն, որն անպիտան է եղել մարտի դաշտում։ Փաշինյանը թող պատասխան տա՝ այն սպառազինությունն ու ռազմական տեխնիկան, որը եղել է հայկական բանակի ձեռքին, ո՞ւր է այն հիմա, ինչո՞ւ ինքը չկարողացավ արագ տիրապետել կառավարման հիմունքներին»։

Ըստ նրա՝ ասօրվա «խաղաղության օրակարգը» խաբկանք է հայ ժողովրդի համար, որովհետեւ իրականում հակամարտությունն ավելի է խորացել, Արցախը հայաթափվել է, Արցախի ժողովրդի նկատմամբ իրականացվել է ցեղասպանություն։ Խաղաղությունը ոչ իրատեսական է, որովհետեւ հակառակորդի ռազմաքաղաքական ղեկավարությունն իր հռետորաբանությամբ չի ձգտում խաղաղության, այլ ձգտում են ճնշումներ գործադրել հայ ժողվորդի վրա։

Ինչ վերաբերում է այսպես կոչված սահմանազատման-սահմանագծման գործընթացին, Օհանյանն ասաց․ «Այն, ինչ անցած տարի իրականացվեց, դա ապօրինի, ոչ օրինական եւ միջազգային սկզբունքներին հակառակ իրականացված միակողմանի ոչ թե սահմանազատում էր, այլ մեր ինքնիշխան տարածքներից հողերի հանձնում էր։ Փոխարենը մենք ոչինչ չստացանք։ Եթե նույն Տավուշից ենք սկսում այդ գործըթնացը, դա նշանակում է, որ այդ ամենը մեզ պարտադրվում է, հակառակ դեպքում մենք կարող էինք սկսել այլ տարածքներից, որտեղ հակառակորդը շուրջ 240 քկմ գտնվում է մեր տարածքում ու չի էլ ուզում այդտեղից դուրս գա»։

«Այսօր կարեւոր օր է, առանցքային օր է մեր երկրի համար, եւ մենք պետք է շարունակենք արժանի լինել այն տղաներին, զինվորներին, սպաներին, ովքեր իրենց կյանքը տվեցին մեր հայրենիքի, մեր պետության, Արագածի ու Արարատի, իրականի ու պատմականի պաշտպանության համար։ Դրանք մեկ միասնական հասկացություններ են, եւ նրանք, ովքեր ուզում են այլ բան ասել, դա իրենց առանձին կարծիքն է»,- Եռաբլուրում լրագրողների հետ զրույցում ասաց «Ժառանգություն» կուսակցության նախագահ Րաֆֆի Հովհաննիսյանը։

Ըստ նրա՝ այսօր մենք վճռական փոփոխությունների առջեւ ենք կանգնած, այդ փոփոխությունները հավաքական իրավասություն են ենթադրում, պատասխանը մեկն է, եւ մեկ հոգի չէ, որ պետք է որոշի մեր ճակատագիրը։ Նա նշեց, որ բոլորս ենք պատասխանատու ու մեղավոր այս իրավիճակի համար, բայց հիմնական հանցավորը, մեղավորն ու երդմնազանցը մեկ մարդ է, ում անունն ինքը այլեւս չի տալիս։ «Ես նրան այլեւս չեմ մեկնաբանում, որովհետեւ մենք պետք է մեկնաբանենք բանակը, տղաներին, զինվորներին, ժառանգությունը, հետագիծը, մեր սխալները, նվաճումները ու մեր ձեռքբերումները։ Այդ ամբողջը մերն է, եւ չկա տարանջատում ու սահման։ Հայրենիքը մեկն է, պետությունը մեկն է, եւ նաեւ հայրենիքի հանձնումը, մեր ռազմագերիների ու ղեկավարների պատանդ մնալը, տղաների կյանքը, դրանք մեղավոր ունեն, գլխավոր պատասխանատու ունեն»,- ասաց Րաֆֆի Հովհաննիսյանը։

Անդրադառնալով Նիկոլ Փաշինյանի՝ Հայոց ցեղասպանությունը կասկածի տակ դնող հայտարարություններին՝ Րաֆֆի Հովհաննիսյանն ասաց․ «Հիմնական պատասխանը մնում է մեկը՝ այդ փոփոխությունը, որը մենք պետք է կատարենք, որովհետեւ այն ժխտողականության, ուրացման քաղաքականությունը, որը Թուրքիան վարել է տասնամյակների ընթացքում, դա իսկապես այսօր կրկնվում է։ Սրանք ուրացման երեւույթներ են, որը մենք տեսնում ենք արդեն հայազգի մարդու եւ գործող պաշտոնյայի կողմից։ Ես դա չեմ մեկնաբանում, ցավալի է, ողբերգական է, մենք արժանի չենք, ոչ մի սերունդ, հատկապես երիտասարդ սերունդը։ Բայց մենք, հատկապես երիտասրադ սերունդը կհաղթահարի նաեւ այս պահը»։