Դավիթն ու Նարեն պահպանում են «առաջնորդությունը». Հայաստանում ծնելիության մակարդակը նվազել է
- 22:41 05.02.2025
Դավիթ և Նարե անունները 10-րդ տարին անընդմեջ գլխավորում են Հայաստանում ծնված երեխաներին տրվող ամենատարածված անունների ցանկը:
2024 թվականին ծնվել է ընդհանուր 33 648 երեխա՝ 16 034 աղջիկ և 17 614 տղա:
Նարե անվանակոչել են 627 աղջկա, իսկ Դավիթ անունը ստացել է 1165 տղա: Վարկանիշի երկրորդ տեղում են Լուսե (563) և Նարեկ (835) անունները, երրորդում՝ Արփին(541) և Հայկը(624), չորրորդում՝ Մարիան (486) և Արեգը (558): Հնգյակը եզրափակում են Եվան (361) և Մարկը (558):
Արական անունների տասնյակում են նաև Միքայել, Ռոբերտ, Տիգրան, Մոնթե և Լեո, իսկ իգական անունների տասնյակում՝ Մանե, Մարի, Մարիամ, Անահիտ, Աննա անունները:
Հայաստանում, ըստ քաղաքացիական կացության ակտերի ռեգիստրի, 2024 թվականին ծնվել է 33 648 անձ, ինչը 2942-ով պակաս է 2023թ–ի համեմատ։ Տեղեկությունը հայտնում է ՀՀ վիճակագրական կոմիտեն, որն ամփոփել է 2024 թվականի հիմնական ժողովրդագրական ցուցանիշները։՛
Վիճակագրության համաձայն` 2023-ի համեմատ նախորդ տարի 1263-ով ավելի շատ մարդ է մահացել` 25 576։