Գագիկ Ավանեսյան. «Արցախյան շարժում. Ամեն ինչ սկսվեց Հադրութից»
- 16:58 12.02.2025
1988 թվականի փետրվարի 12-ին Հադրութում տեղի ունեցավ առաջին հանրահավաքը, որը որոշիչ դարձավ ազատագրական պայքարում։
Արցախյան շարժման ակտիվիստ Գագիկ Ավանեսյանը Step1.am-ի հետ զրույցում պատմեց, թե ինչպես սկսվեց ամեն ինչ. Հադրութի շրջանում հայկական հեռուստատեսության հեռարձակումը թույլատրելու պահանջով ստորագրահավաքի մասին, թե ինչպես անտեսվեց ու հալածվեց ճարտարապետ և նկարիչ Էմիլ Աբրահամյանի խաղաղության նախաձեռնությունը.
Կենտրոնական սովետական իշխանությունը չէր շտապում բավարարել հադրութցիների՝ իրենց իրավունքները պաշտպանելու ձգտումները։ Իսկ Գորբաչովյան «պերեստրոյկայի» սկիզբը վերակենդանացրեց Հայաստանի հետ վերամիավորման պայքարը։ Ավանեսյանը նշել է արցախյան շարժման գաղափարախոսների դերը, խոսել կոլեկտիվ բողոքարկման գործընթացի սկզբի և փաստաթղթերում կնիքի առկայության մասին։
1988 թվականի փետրվարի 12-ին Բաքվի էմիսարները հանդիպումներ են անցկացրել ԼՂԻՄ-ի բոլոր շրջաններում՝ նպատակ ունենալով համոզել Արցախի ժողովրդին հրաժարվել Հայաստանի հետ «Միացումից»։ Հադրութում նրանք դիմադրության են հանդիպել և բռնվել՝ հանդիպման արձանագրությունը կեղծելու փորձի վրա։
Գագիկ Ավանեսյանը պատմեց, թե ինչպես են Հադրութի շրջանի բնակիչները հավաքվել հանրահավաքի, ինչպես են հասել հանդիպման կեղծ արձանագրությունների ոչնչացմանը, և որ ժողովուրդը հենց այս օրն է Արթուր Մկրտչյանին որպես առաջնորդ առանձնացրել։
Ալվարդ Գրիգորյան