Մյունխենի Անվտանգության կոնֆերանսից մեկ օր առաջ Մյունխենում մեքենան մխրճվել է ամբոխի մեջ
- 16:22 13.02.2025
Մյունխենում մեքենան մխրճվել է ամբոխի մեջ, կան տուժածներ. այս մասին X սոցիալական ցանցում հայտնել է քաղաքի ոստիկանությունը։ «Դեպքի վայրում ավտոմեքենան մխրճվել է մարդկանց խմբի մեջ։ Մի քանի մարդ վիրավորվել է»,- ասվում է հաղորդագրության մեջ։
Ոստիկանության տվյալներով՝ բախման հետևանքով տուժել է առնվազն 28 մարդ, որոնցից մի քանիսը ստացել են միջինից մինչև ծանր վնասվածքներ։ Դատելով դեպքի վայրից սոցցանցերում հրապարակված կադրերից՝ վարորդը վարել է Mini Cooper-ը։
Bayerischer Rundfunk մեդիա ընկերությունը հայտնում է, որ մեքենան մխրճվել է Ver.di արհմիության գործադուլի մասնակիցների մեջ։ Ականատեսներից մեկն ասաց, որ մեքենան միտումնավոր է մխրճվել ամբոխի մեջ։ Մյուս ականատեսները ասում են, որ ոստիկանները կրակել են վարորդի վրա: Իր հերթին ոստիկանությունը հայտնել է, որ վարորդը ողջ է և բերման է ենթարկվել։ Ավելի ուշ հայտնի դարձավ, որ մեքենան վարել է Աֆղանստանի 24-ամյա մի քաղաքացի, ով գտնվում է Գերմանիայում՝ քաղաքական ապաստան խնդրելով։ Նա նախկինում ձերբակալվել էր գողության և թմրամիջոցների ապօրինի շրջանառության համար։
Բավարիայի նահանգի վարչապետ Մարկուս Սյոդերը հաստատել է, որ ենթադրվում է, որ դա նպատակային հարձակում է եղել։
Հիշեցնենք, որ փետրվարի 14-ին Մյունխենում բացվում է անվտանգության ամենամյա միջազգային համաժողովը։