Վաշինգտոնը «դուրս մղեց» Եվրոպային Ուկրաինայի մասին բանակցություններից
- 21:54 15.02.2025
DW
Վաշինգտոնը եվրոպացիներին չի տեսնում որպես Ուկրաինայում Ռուսաստանի պատերազմին վերջ տալու բանակցությունների անմիջական մասնակից, շաբաթ օրը՝ փետրվարի 15-ին, Մյունխենի անվտանգության համաժողովի շրջանակներում հայտարարել է Ուկրաինայի և Ռուսաստանի հարցերով ԱՄՆ նախագահ Դոնալդ Թրամփի հատուկ բանագնաց Քիթ Քելոգը։ Միաժամանակ Քելլոգը վստահեցրել է, որ հաշվի կառնվեն եվրոպական շահերը։
Ամերիկացի գեներալի խոսքով՝ բանակցությունների սեղանի շուրջ կլինեն «ուկրաինացիներ, ռուսներ եւ, իհարկե, ամերիկացիներ», հաղորդում է Associated Press-ը։
Թրամփի հատուկ ներկայացուցիչն այս դիրքորոշումը բացատրել է նրանով, որ ԱՄՆ-ն ցանկանում է խուսափել կարգավորման Մինսկի ձևաչափի խնդիրներից, երբ բանակցություններում ներգրավված են եղել չափազանց շատ մասնակիցներ, որոնք իրական ազդեցություն չեն ունեցել խաղաղ գործընթացի վրա։ «Մենք չենք պատրաստվում գնալ այդ ճանապարհով», – ասաց Քելլոգը:
Միևնույն ժամանակ, Քիթ Քելլոգը նշել է, որ «անհրաժեշտ է ապահովել Ուկրաինայի ինքնիշխանությունը», և «եվրոպական դաշինքը վճռորոշ դեր է խաղալու դրանում»։
Ի պատասխան Կելլոգի խոսքերի՝ Շվեդիայի արտաքին գործերի նախարար Մարիա Մալմեր Շտեներգաարդն ասել է, որ եվրոպացի ներկայացուցիչները պետք է լինեն բանակցությունների սեղանի շուրջ, եթե նրանցից ակնկալվում է զորքեր ուղարկել Ուկրաինա, գրում է РБК-Украина հրատարակությունը։