Դոգը ծանր վիճակում հոսպիտալացվել է. ո՞վ կլսեր նրան առանց հայհոյանքի
- 18:06 21.02.2025
ԱՄՆ-ում բնակվող սկանդալային բլոգեր Վարդան Ղուկասյանը (Դոգ) հոսպիտալացվել է։ Ինչպես հայտնում է usarmenianews.com-ը, նա սրտի հետ կապված լուրջ խնդիրներ ու արյան բարձր ճնշում ունի։ Վիճակը գնահատվում է ծայրահեղ ծանր։
Ղուկասյանի գլխավորած DOK կուսակցությունը չի հերքել այս տեղեկությունը։ Սոցցանցերում նրանք միայն նշել են, որ տեղյակ են հրապարակման մասին և խոստացել են, որ անհրաժեշտության դեպքում պաշտոնական հայտարարություն կանեն, հայտնում են լրատվամիջոցները։
Դոգը դարձավ հետպատերազմյան Հայաստանի խորհրդանիշը՝ մարմնավորելով այն ողջ ագրեսիան, որը կուտակվել էր մարդկանց մեջ նվաստացման, պատիվն ու արժանապատվությունը ոտնահարելու ամենածանր ժամանակաշրջանում։
Շատերն իրենց հարցնում են՝ կլսե՞ին Դոգին, եթե նա խոսեր առանց հայհոյելու և առանց աչքերը կկոցելու։ Պատասխանը «ոչ» է, քանի որ նա ոչ մի նոր բան այդպես էլ չասաց, բացառությամբ, հնարավոր է, ներքին տեղեկատվության արտահոսքի, որը կարող էր արտահոսել առանց նրան էլ: Սա նշանակում է, որ Դոգի «ֆենոմենը» բաղկացած է կոլեկտիվ ագրեսիան արտահայտելու նրա կարողությունից՝ թույլ չտալով, որ այն առաջացնի ռեւանշիզմի ալիք։
Դոգի հոսպիտալացումը կարող է պատճառ հանդիսանալ հայաստանյան քաղաքական ասպարեզից նրա հեռանալու համար, որտեղ նա արդեն բեռ է դարձել։ Ընտրողների ագրեսիան այլևս չի կարելի վատնել Դոգի վրա, այն պետք է պահել իրական մարտերի համար։