«Հրաժեշտի աչքեր»-ը՝ վերադարձի հույսով
- 16:57 24.02.2025
«Հակարիի կամրջից այն կողմ իմ մանկությունն էր, երազանքնեերն ու հորս եւ այլ տղաների ձեռք բերած հաղթանակը։ Կամրջից այս կողմ ես մնացել էի անզոր, մեղավոր։ Այդ ամենը սփոփելու համար սկսեցի նամակներ գրել մորս, որոնք դարձան պատմվածքներ»,- ասում է Հերմինե Ավագյանն, ում նամակներն Արցախին ու իր մայրիկին դարձան պատմվածքներ՝ «Հրաժեշտի աչքեր» վերնագրով։
Նախորդ տարի գրքի և արվեստի փառատոնին Newmag-ի և Թովմասյան հիմնադրամի կողմից հայտարարված արցախյան հեղինակների գրական մրցույթի դափնեկիրն է Հերմինեն, գիրքի հրատարակման գլխավոր հովանավորը «Ամրոց» ազգային զարգացման հիմնադրամն է։
Newmag-ի օրերս տեղի ունեցած գրքի եւ արվեստի փառատոնին գիրքը հասանելի դարձավ ընթերցողներին։
Շնորհանդեսի ժամանակ բանաստեղծ Ներսես Աթաբեկյանը, խոսելով Հերմինեի գրքի մասին, նշել է․ «Դժվար է ցավի մեջ տրամաբանորեն դատելը։ Գիրքը գուցե լիներ սովորական գիրք, եթե չլիներ ցավի զգացողությունը։ Ցավը մղում է գործելու։ Այս գիրքը ոչ թե պատմվածքների ժողովածու է։ Հերմինեի պատմությունների հիմքում իրական հերոսներ են՝ աշխարհի ամենագեղեցիկ ու սիրելի անկյունում ապրած։
«Իմ մի ես-ը ապրում է կամրջից այն կող, մյուսը՝ այս։ Հավատում եմ, որ մի օր այդ երկու ես-երը ամբողջանալու են եւ հանդիպելու են կամրջի ոչ թե այս, այլ ՝ այն կողմում» -Արցախում մեզ վերագտնելու հավատի մասին է նշել Հերմինեն։
Մարիամ Սարգսյան
