Պայթուցիկ սարքեր են նետվել Մարսելում Ռուսաստանի հյուպատոսության վրա
- 17:49 24.02.2025
Ֆրանսիայում՝ Ուկրաինա Ռուսաստանի զինված ներխուժման մեկնարկի երրորդ տարելիցին, պայթյուն է որոտացել Մարսելում ՌԴ գլխավոր հյուպատոսության շենքի մոտ։ Երկուշաբթի՝ փետրվարի 24-ին, ոստիկանության ներկայացուցիչը հայտնել է, որ առավոտյան գլխավոր հյուպատոսության շենքի պատին երեք պայթուցիկ սարք են նետել, որոնցից երկուսը պայթել են։ Ըստ նախնական տեղեկությունների՝ զոհեր և վիրավորներ չկան։
Հարձակվողը փախել է։ Ոստիկանությունը դեռ մանրամասներ չի հրապարակում պայթուցիկ սարքերի տեսակի մասին և որևէ վարկած չի ներկայացնում հարձակման դրդապատճառների մասին։ Դատախազությունը հետաքննություն է սկսել գույքին դիտավորությամբ վնասելու փաստով, սակայն նշել է, որ շենքին տեսանելի վնաս չի պատճառվել։
ՌԴ ԱԳՆ պաշտոնական ներկայացուցիչ Մարիա Զախարովան RBC-ին ասել է, որ պայթյունը «ահաբեկչական հարձակման բոլոր նշաններն ունի»։
Հյուպատոսությունը գտնվում է Ամբրուազ Պարեի պողոտայում։ Թաղամասում են գտնվում նաև Եգիպտոսի, Թունիսի, Հայաստանի և այլ երկրների դեսպանություններն ու հյուպատոսությունները։