“Առաջիկայում միջազգային կառույցներից մեկը գնահատական կտա հայ գերիների հարցով”

«Եվրոպական միության խորհրդարանը եւ մի շարք միջազգային կառույցներ հստակ, հասցեական հայտարարություններ են ընդունել Ադրբեջանում ապօրինաբար պահվող հայ գերիների վերաբերյալ։ Հայաստանի Հանրապետության Ազգային ժողովը՝ ՔՊ-ական մեծամասնությունը հրաժարվեց ընդունել հայտարարություն։ Այսինքն՝ ԵՄ խորհրդարանը հասցեական հայտարարություն է տարածել, ՀՀ խորհրդարանը՝ ՔՊ-ի մեծամասնության պատճառով, ընդդիմության ներկայացրած հայտարարությա տեքստը վիժեցրեց»,- այսօր լրագրողներին ասաց ԱԺ «Պատիվ ունեմ» խմբակցության պատգամավոր Հայկ Մամիջանյանը։

Նա նշեց, որ այս պահին ոչինչ չի արվում Բաքվի բանտերում ապօրինաբար պահվող հայ գերիներին վերադարձնելու ուղղությամբ։  Հայ գերիները բարձրացրել են իրենց  հանդեպ ապօրինությունների հարցը, Արցախի նախկին պետնախարար Ռուբեն Վարդանյանը հացադուլ է հայտարարել ու ասել, որ հրաժարվում է մասնակցել «դատավարություն» անվանվող այդ ֆարսին։

Հայկ Մամիջանյանը նշեց, որ Հայաստանի խորհրդարանական դիվանագիտության, ԱԳՆ օրակարգում այդ հարցը պետք է լիներ առաջնային հարցերից մեկը։ Իշխանությունների այն հայտարարություններին, որ գործընթացը չեն հանրայնացնում, որպեսզի չվնասեն, Հայկ Մամիջանյանը պատասխանեց․ «Իսկ չեք լսե՞լ, որ գործ չանելու լավագույն պատճառաբանությունը «մենք չենք հանրայնացնում»-ն է։ ՀՀ ԱԺ պատգամավորների՞ց էլ են դա գաղտնի պահում։ Մենք ամեն օր դրա մասին խոսում ենք, եթե մի կաթիլ գործ արած լինեին, ամեն օր կասեին»,- նշեց նա։

Հայկ Մամիջանյանն ասաց, որ իրենց կողմից աշխատանք է տարվում, առաջիկայում միջազգային կառույցներից մեկը գնահատական կտա հայ գերիների հարցով։ Նշեց, որ չի ցանկանում մանրամասներ հայտել, որպեզի չվնասի գործընթացին։