ՀՅԴ․ Թրամփն ավելին էր խոստացել ի զարմանս մեզ, որովհետեւ բավական լրջորեն հայկական դոսյեն ուսումնասիրել էր
- 15:42 26.02.2025
ՀՅԴ-ն արցախցիների վերադարձի համար միջազգային երաշխիքներ ունենալու հարցով այսօր աշխատանք է իրականացնում ԱՄՆ-ում, Ֆրանսիայում, Ռուսաստանում եւ Միջին Արեւելքում։
«Օրինակ՝ Ֆրանսիայի դեպքում անմիջապես նախագահի պալատի հետ ենք այդ աշխատանքը տանում, իսկ ԱՄՆ-ում՝ նոր վարչակարգի հետ»,- այսօր ՀՅԴ 35-րդ ընդհանուր ժողովից առաջ լրագրողներին ասաց ՀՅԴ Բյուրոյի ներկայացուցիչ Հակոբ Տեր-Խաչատուրյանը։ Նա նշեց, որ կան երկրներ, որոնք պատրաստ ենք անվտանգության միջազգային երաշխիքներ ապահովել արցախցիների վերադարձի համար։
«Արցախի հարցի լուծումը հետեւյալ ձեւով ենք պատկերացնում՝ առաջինը, արցախահայությունը պետք է համախումբ ապրի Հայաստանում, եւ պետք է ստեղծենք պայմաններ, որ չարտագաղթեն։ Երկրորդ, համաշխարհային առումով պետք է աշխատանք տանենք հավաքական վերադարձի իրավունքի համար։ Եվ սա ցնորք չէ, որովհետեւ որոշ պետություններ արդեն իսկ այս ուղղությամբ համախոհությունեն հայտնել։ Արցախցիներին միջանկյալ կագավիճակ շնորհելով՝ միջազգային երշախիքների տակ ժողովուրդը պետք է վերադառնա իր բնիկ հողերը եւ այնտեղ կառուցի իր կյանքը»,- ասաց նա։
Հարցին, թե որ երկրերն են պատրաստ տալ միջազգային երաշխիք, Հակոբ Տեր-Խաչատուրյանը պատասխանեց․ «Անվտանգության երախիքները պետք է տա միջազգային հանրությունը։ Եվ դրա համար է, որ մենք աշխատանք ենք տանում։ Չենք կարող հիմիկվանից ասել, թե որ պետությունը պետք է ստանձնի այդ պատասխանատվությունը, բայց այդ ուղղությամբ հետաքրքրվող երկրներ կան»։
Նա հիշցրեց ԱՄՆ նախագահ Թրամփի՝ ավելի վաղ արած հայտարարությունը՝ արցախցիներին օգնելու անհրաժեշտության մասին։ Ասաց, որ ընտրություններից առաջ գերիերի հարցով իրենք հատուկ խնդրանք են ուղղել Թրամփին, որպեսզի ճնշում գործադրի Ադրբեջանի վրա՝ վերդարձնելու Բաքվի բատերում գտնվող Արցախի ռազմաքաղաքական ղեկավարությանն ու հայ գերիներին։
«Բայց Թրամփն ավելին էր խոստացել ի զարմանս մեզ, որովհետեւ նախկինում հայկական հարցերով այդքան էլ մտահոգված չէր, իսկ այս անգամ բավական լրջորեն հայկական դոսյեն ուսումնասիրել էր՝ իր շրջապատի հետ մեր տարած աշխատանքի շնորհիվ: Որոշակի ազդակներ ստացել ենք, եւ ուրախ ենք ասել, որ երեք անձինք կան, որոնք ԱՄՆ-ումբարձր պաշտոնների վրա են, որոնք ոչ միչայն ծանոթ են հայությանը, այլ նաեւ այցելել են Արցախ։ Այսինքն՝ կան նախանշաններ, բայց շատ շուտ է, որ 100 օրվա ընթացքում ԱՄՆ նախագահը Հայաստանի հարցը բարձրացնի իր առաջնահերթությունների մեջ։ Թեկուզ վստահ եղեք, որ աշխատանքը շարունակվելու է, ամեն գնով այդ ճնշումները մենք գործադրում ենք տարբեր երկրներում»,- հավելեց նա։
Հակոբ Տեր-Խաչատուրյանը նաեւ ասաց, որ «խաղաղության պայմանագրի» հարց այսօր չկա, որովհետեւ Ադրբեջանը խաղաղություն չի ցանկանում։