New Perspective. արցախցիների հետ աշխատում են Արցախում ողբերգությունն ապրած մարդիկ
- 21:26 27.02.2025
Արցախում 44-օրյա պատերազմը և դրան հաջորդած իրադարձությունները հոգեբանական խորը տրավմա են պատճառել մեր հայրենակիցներից շատերին։
«Խորապես գիտակցելով հարկադիր տեղահանության պայմաններում Արցախի ժողովրդի հոգեբանական աջակցության կարևորությունը՝ մենք հավաքել ենք արցախցի հոգեբանների թիմ։ Այսպես առաջացավ «New Perspective» նախաձեռնությունը։ Ծրագրի առաքելությունն է վերականգնողական տարբեր մեթոդներով նպաստել արցախցի հայրենակիցների համայնքային մտածելակերպի և ինքնության պահպանմանը, ինչպես նաև նրանց ինտեգրմանը նոր հասարակությանը։
Նախաձեռնությունը գործում է բացառապես անհատույց հիմունքներով։ Մեր բոլոր մասնագետները Արցախից են։ Մինչև բռնի տեղահանումը, ապրելով հայրենիքում անմարդկային շրջափակման պայմաններում, նրանք չեն դադարեցրել աշխատանքը՝ իրենց հայրենակիցներին ցուցաբերելով անհրաժեշտ հոգեբանական օգնություն։ Հայրենիքից հեռու, անորոշության պայմաններում մեր մասնագետներն ուժ գտան շարունակելու այս չափազանց կարևոր առաքելությունը։
Մեր ծրագրի առանձնահատկությունն այն է, որ շահառուների հետ աշխատում են մարդիկ, ովքեր իրենք են ապրել Արցախում տեղի ունեցած ողբերգությունը, ինչպես նաև ամեն օր հաղթահարում են դրա հետևանքները։ Սեանսներն անցկացվում են արցախյան բարբառով, որն ավելի ջերմ ու վստահելի մթնոլորտ է ստեղծում։
Նախագիծը արագ զարգանում և ընդլայնում է իր աշխարհագրությունը։ Մեզ մոտ աշխատում են ոչ միայն հոգեբաններ, այլև սոցիալական աշխատողներ և պարուսույց։ Այս կերպ մենք նաև պահպանում ենք արցախյան մշակույթը։
Այս փուլում նախագիծը իրականացվում է Indie Peace անկախ կազմակերպության կողմից՝ Եվրամիության աջակցությամբ և ընդգրկում է Երևանը, Մարտունին և Ստեփանավանը։ Ծրագրի շահառուներն ի սկզբանե եղել են միայն Արցախից բռնի տեղահանվածները։ Սակայն այժմ մենք աշխատում ենք նաև Հայաստանում բնակվող հայրենակիցների հետ, որպեսզի ապահովենք բոլոր անհրաժեշտ պայմանները Արցախի բնակիչների շփման և նոր հասարակության մեջ ինտեգրվելու համար։
Այսօր նախագծում ներգրավված է մոտ 200 մարդ։ Դատելով դրական արձագանքներից՝ նախագիծն օգնեց ոչ միայն անմիջական մասնակիցներին, այլեւ բարերար ազդեցություն ունեցավ նրանց ընտանիքների վրա, ինչից ելնելով տեսնում ենք դրա շարունակականության անհրաժեշտությունը։
Առաջիկայում նախատեսում ենք բացել հասարակական կազմակերպություն, ինչպես նաև ընդլայնել ծառայությունների շրջանակը և գործունեության աշխարհագրությունը։ Մասնավորապես, մենք ցանկանում ենք նախագիծը սկսել Հայաստանի հեռավոր շրջաններում»։
Այս մասին Step1.am-ի հետ զրույցում ասաց «New Perspective» նախագծի համակարգող Կատերինա Կալոեւան։
Արսեն Աղաջանյան