Թրամփը Հայաստանից և՞ս ոսկի ու մետաղներ է պահանջում. ողջույն, Ամուլսար
- 19:59 28.02.2025
Այսօր ԱՄՆ-ը նախատեսում է գործարք կնքել Ուկրաինայի հետ, ըստ որի՝ ԱՄՆ-ն իրավունք կստանա Ուկրաինայում ռազմավարական նշանակություն ունեցող մետաղներ մշակել։ Թրամփը գործարքը գնահատում է 500 միլիարդ դոլար և այն անվանում «ամերիկյան օգնության վերադարձ»։
Ավելի վաղ Թրամփը առաջարկել էր Գազայի վերականգնման հարցը լուծել Պաղեստինում «թանկարժեք անշարժ գույքի» հաշվին, որը կարող է վերածվել արևելյան Ռիվիերայի։
Աշխարհաքաղաքական խնդիրների լուծման հարցում Թրամփի բիզնես-մոտեցումները վկայում են այն մասին, որ ԱՄՆ-ն կհայտարարի իր շահերի մասին նաև Հարավային Կովկասում։ Թերեւս այս մասին Փաշինյանին ակնարկել են Վաշինգտոն կատարած այցի ժամանակ։ Պատահական չէ, որ հենց այդ օրերին գործադուլներ սկսվեցին Զանգեզուրի պղնձամոլիբդենային կոմբինատում, որի բաժնետոմսերը պատկանում են ռուսական ընկերությանը։ Գործադուլը սպառնում էր սնանկացնել Հայաստանի խոշորագույն հարկատուին։
Բայց հարցը կարգավորվեց, և Հայաստանի կառավարությունը որոշեց փոխել ուղղությունը և Ամուլսարի ոսկու հանքի շահագործման համար Լիդիանին տրամադրել 150 մլն դոլար վարկի երաշխիք։
«Հրաշալի նորություն! ԱՄՆ դեսպանատունը ողջունում է Լիդիանի և Հայաստանի միջև ձեռք բերված համաձայնությունը Հայաստանում Ամուլսարի հանքարդյունաբերության լայնածավալ ծրագրի վերաբացման վերաբերյալ, ինչը թույլ կտա միլիոնավոր դոլարներ ներդնել տնտեսության մեջ, ստեղծել աշխատատեղեր և բարգավաճում Միացյալ Նահանգների և Հայաստանի համար», – ասված է ԱՄՆ դեսպանատան հաղորդագրության մեջ։
Նշվում է, որ Հայաստանը բաց է ամերիկյան բիզնեսի համար, և ԱՄՆ դեսպանատունը հպարտությամբ աջակցում է այս քաղաքականությանը, քանի որ երկու երկրներն էլ համատեղ աշխատում են ապագա բարգավաճումն ապահովելու համար։
Թե ուր կգնա Արցախի ոսկին, հավանաբար, նույնպես շուտով պարզ կդառնա։ Նաև այն, թե ինչի դիմաց է ԱՄՆ-ը վերցնելու հայկական ոսկին։