“ՄԱԿ-ի մարդու իրավունքների հարցով ամենաբարձր պաշտոնյան հավաստում է, որ այն, ինչ կատարվոմ է Ադրբեջանում, ապօրինի է”

Արցախի մարդու իրավունքների պաշտպան Գեղամ Ստեփանյանն այսօր լրագրողների հետ զրույցում անդրադարձավ հարցին, որ Բաքվի բանտերում գտնվող հայ գերիները կտտանքների են ենթարկվում։ «Հայ գերիները կամ այդ պատճառով չեն ցանկանում տեսակապով կապվել իրենց հարազաների հետ, կամ էլ նրանց թույլ չեն տալիս տեսակապով կապվել, որպեսզի խոշտանգման նոր փաստեր ու հետքեր չբացահայտվեն։ Այդ մարդիկ, գտնվելով անազատության մեջ, ստիպված են կատարել այն, ինչ ադրբեջանական իշխանություններն են թելադրում»,- ասաց Գեղամ Ստեփանյանը։

Նա նշեց, որ առաջին հերթին փորձ է արվելու նրանցից կորզել այնպիսի ցուցմունքներ, որոնք վնաս են տալու ոչ միայն իրենց, այլ նաեւ Հայաստաի Հանրապետությանը։ «Երկրորդ, արձանագրենք, որ սա կոնկրետ արյունարբու մի բռնապետի անձնական վրեժխնդրությունն է մարդկանցից, ովքեր պայքարել են իրենց ժողովրդի ազատության, անկախության ինքնորոշման իրավունքի համար։ Եվ սրանով ադրբեջանական բռնապետը փորձում է այսպես ասած դաս տալ նաեւ Ադրբեջանում ապրող փորքրամասնություններին, որ ազատության համար ցանկացած պայքար կարող է նման վերջաբան ունենալ»,- նշեց նա։

Արցախի ՄԻՊ-ն ասաց, որ այն ցուցմունքները, որոնք կորզվում են Բաքվի բանտերում գտնվող անձանցից՝ նրանց կյանքի ուղիղ սպառնալիքի, խոշտանգումների ու անմարդկային վերաբերմունքի ներքո, իրավաբանական տեսանկյունից չունեն որեւէ նշանակություն։ «Եվ երեկ ՄԱԿ-ի Մարդու իրավունքների Բարձր հանձնակատարի կողմից պահանջ հնչեց ազատելու բոլոր ապօրինի ձերբակալվածներին եւ ապահովելու արդար դատաքննության իրավունքը։ Սա ցույց է տալիս, որ ՄԱԿ-ի մարդու իրավունքների հարցով ամենաբարձր պաշտոնյան եւս հավաստում է եւ ուղերձ է հղում, որ այն, ինչ կատարվոմ է Ադրբեջանում, ապօրինի է, եւ դրա հետեւանքով կայացված վճիռները որեւէ իրավաբանական նշանակություն չեն կարող ունենալ»,- հայտարարեց Գեղամ Ստեփանյանը։

Բաքվի բանտերում ապօրինի պահվող հայ գերիների հարցով այսօր նամակներ հանձնվեցին ՀՀ ԱԳՆ-ին եւ Հայաստանում Շվեյցարիայի դասպանատանը։ Գեղամ Ստեփանյանն ասաց, որ Շվեյցարայից ու միջազգային հանրությունից ակնկալիքն այն է, որ այս հանցագործությունների դեմ պետք է հստակ գործողություններ ձեռնարկվեն։ Պետք է գործել հենց հիմա, քանի որ ցանկացած օրն ու ժամը Բաքվում ապօրինաբար պահվող հայերի համար կարող է ճակատագրական դառնալ։