Ամերիկացիները կստանձնեն Պանամայի ջրանցքի շուրջ գտնվող հիմնական նավահանգիստների վերահսկողությունը

ԱՄՆ նախագահ Դոնալդ Թրամփի ճնշման ներքո Հոնկոնգում գտնվող Hutchison-ը հայտարարել է, որ որոշել է Պանամայի ջրանցքի տարածքում երկու խոշոր նավահանգիստների վերահսկողությունը հանձնել ամերիկյան կոնսորցիումին:

CK Hutchison Holdings-ը հայտնել է, որ ամերիկյան BlackRock ներդրումային ընկերության գլխավորած կոնսորցիումին է վաճառելու է Panama Ports Company-ի 90 տոկոս բաժնետոմսերը, որը շահագործում է ջրանցքի երկու կողմերում գտնվող Balboa և Cristobal նավահանգիստները:

Ավելի քան 14 միլիարդ դոլար արժողությամբ գործարքի պայմաններով ամերիկացիները կտիրեն նաև Hutchison-ի դուստր ձեռնարկությունների ակտիվների 80%-ին, որոնք կառավարում են 43 նավահանգիստներ և ենթակառուցվածք 23 երկրներում, այդ թվում՝ Բրիտանիայում, Գերմանիայում, Մերձավոր Արևելքում և Հարավարևելյան Ասիայում:

Վերլուծաբանների կարծիքով՝ հիմնական նավահանգիստների նկատմամբ վերահսկողությունը փոխանցելու որոշումը կարող էր ընդունվել ամերիկյան նոր վարչակազմի ճնշման ներքո։ Իր նախագահության առաջին օրերին Դոնալդ Թրամփը պնդումներ էր անում, որ Չինաստանը վերահսկում է ջրանցքը, և սպառնում էր այն վերադարձնել ԱՄՆ-ի վերահսկողությանը:

Թրամփը նույնիսկ չի բացառել բռնությամբ տիրանալու հնարավորությունը, ինչը առաջացրել է Պանամայի իշխանությունների և տեղի բնակիչների զայրացած արձագանքը, որոնք դուրս են եկել փողոց՝ բողոքելու։