Անդրանիկ Քոչարյանը համարձակվեց մեղադրել ռուսներին և կրկնեց, որ “գերի չպիտի ընկնեյին”
- 13:08 05.03.2025
ՔՊ-ական պատգամավոր Անդրանիք Քոչարյանը, որը հավաքել է 44-օրյա պատերազմի մասին ամբողջ տեղեկությունը (կոմպրոմատը) և չի հրապարակում, այսօր կրկնեց, որ պետք է Արցախի ռազմաքաղաքական ղեկավարությունը գերի չընկներ։
«Բաքվի դատավարության ընթացքում դա օգտագործվելու էր Հայաստանի դեմ: Իհարկե, նրանց տարել են առանձնատուն, այդ բացահայտումները հերթականությամբ կլինեն, իմ ասածը ուրիշ բանի մասին է. ամեն ինչ պետք է արվեր, որպեսզի Արցախի ռազմաքաղաքական ղեկավարությունը չգերևարվեր: Դա պետք է անեին անվտանգության աշխատակիցները, այդ թվում ռուս խաղաղապահները»:
Անդրանիկ Քոչարյանը չխոսեց ՀՀ իշխանության դերի մասին, նաև չասեց, արդյո՞ք իշխանությունները բարձրացնում են այս հարցը Ռուսաստանի հետ բանակցություններում։
Գերիները հավատացին ռուսներին և մինչև վերջ գնացին, էդ գերեվարվելն էլ է ուրիշ ընթացք ունեցել։ Այս մասին այսօր ասաց «Երկրապահ» կամավորական միության վարչության նախագահ Սասուն Միքայելյանը։
Ոչ ոք չի մանրամասնում, թե ինչ են խոստացել ռուսները և արդյո՞ք հնարավորություն կար “չհավատալ” ռուսներին։ Չէ՞ որ պաշտոնական Երևանն ասում էր, որ կապ չունի Արցախում կատարվածի հետ։
Հայաստանում արդեն մի քանի բողոքի ակցիա է կազմակերպվել՝ գերիներին վերադարձնելու պահանջով, բայց դրանցից ոչ մեկը Ռուսաստանի դեսպանատան մոտ չի կայացել։