Մակրոնի «միջուկային զսպումը» շոկ է առաջացրել Մոսկվայում
- 15:54 06.03.2025
Ռուսաստանը միջուկային զենքի մասին Ֆրանսիայի նախագահ Էմանուել Մակրոնի հայտարարությունները համարում է սպառնալիք, հայտարարել է արտգործնախարար Սերգեյ Լավրովը։
«Իհարկե, դա սպառնալիք է Ռուսաստանի դեմ։ Չէ՞ որ նա մեզ սպառնալիք է համարում, եվրոպական երկրների և Բրիտանիայի գլխավոր շտաբների պետերի հանդիպում է հրավիրում, ասում է, որ անհրաժեշտ է միջուկային զենք կիրառել, պատրաստվում է միջուկային զենք կիրառել Ռուսաստանի դեմ։ Սա, իհարկե, սպառնալիք է»,- ասել է Լավրովը։
Նախարարը Նապոլեոնին և Հիտլերին անվանեց «[Մակրոնի] նախորդներ, որոնք նույնպես ցանկանում էին կռվել Ռուսաստանի դեմ»։
Հիշեցնենք, որ Մակրոնը հայտարարել էր, որ եթե ԱՄՆ-ն դուրս բերի իր միջուկային մարտագլխիկները Եվրոպայից, ապա Ֆրանսիան կարող է փոխարինել դրանք։ Նա ասել է, որ Եվրոպային անհրաժեշտ է Ռուսաստանի դեմ միջուկային զսպման միասնական համակարգ։
Ռուսաստանի Անվտանգության խորհրդի փոխնախագահ Դմիտրի Մեդվեդեւը կանխատեսել է Ֆրանսիայի նախագահ Էմանուել Մակրոնի «անհետացումը» «ոչ ուշ, քան 2027թ. մայիսի 14-ին»։
Այդպես է Մեդվեդեւն արձագանքել Ֆրանսիայի նախագահի ազգին հղած ուղերձին, որի ընթացքում Մակրոնը հայտնել է միջուկային զսպման անհրաժեշտության մասին։
«Մինչ ես խոսում եմ ձեզ հետ, Ռուսաստանը երկար տարիներ սպառնալիք է դարձել Ֆրանսիայի եւ Եվրոպայի համար», ասել է Մակրոնը: Բայց ինքը՝ Մակրոնը, մեծ սպառնալիք չի ներկայացնում: Նա ընդմիշտ կվերանա ոչ ուշ, քան 2027թ. մայիսի 14-ին։ Եվ ոչ ոք նրան չի էլ հիշի»,- Х սոցցանցում գրել է ՌԴ Անվտանգության խորհրդի ղեկավարի տեղակալը։
Մոսկվան երկար ժամանակ համագործակցում է Բաքվի հետ Մակրոնի դեմ՝ Ֆրանսիային մեղադրելով «տարածաշրջանի» գործերին միջամտելու մեջ։ Բաքուն նույնիսկ ֆրանսիական գաղութներում ֆինանսավորեց «հակագաղութային» շարժումներ։
Մոսկվան անհամբեր սպասում է Մակրոնի հեռանալուն, որպեսզի կարողանա ընդլայնել իր տարածումը Վարշավայի պայմանագրի տարածքում՝ առանց որևէ դիմադրության։ Մոսկվայի միակ «փաստարկը» մնում է միջուկային զենքը, ինչի պատճառով էլ Մոսկվան թշնամաբար է արձագանքել միջուկային զսպման մասին Մակրոնի հայտարարությանը։