Հայաստանի սահմանների հարցը կընդգրկվի՞ ԱՄՆ-Իրան բանակցությունների օրակարգում

ԱՄՆ նախագահ Դոնալդ Թրամփը հայտարարել է, որ նամակ է ուղարկել Իրանի գերագույն առաջնորդ Ալի Խամենեիին, քանի որ «գերադասում է Իրանի հետ գործարք կնքել», Reuters-ը մեջբերում է Թրամփի խոսքերը Fox Business-ին տված նրա հարցազրույցից։

Ավելի վաղ ԱՄՆ նախագահ Դոնալդ Թրամփը ստորագրել էր Իրանի վրա առավելագույն ճնշում գործադրելու գործադիր հրամանը՝ միաժամանակ հույս հայտնելով, որ Վաշինգտոնը ստիպված չի լինի հաճախակի օգտագործել այն։

Իրանը ուղիղ բանակցությունների մեջ չի մտնի ԱՄՆ-ի հետ, քանի դեռ նրանք շարունակում են Թեհրանի դեմ առավելագույն ճնշումների և սպառնալիքների քաղաքականությունը։ Այս մասին հայտարարել է այսօր Իրանի արտգործնախարար Աբբաս Արաղչին՝ մեկնաբանելով Խամենեիի նամակի վերաբերյալ Թրամփի հայտարարությունը։

Պաղեստինում և Լիբանանում Իսրայելի գործողություններից, ինչպես նաև Սիրիայում Թուրքիայի իշխանափոխությունից հետո, որոնք հանգեցրին Մերձավոր Արևելքում իրանամետ ուժերի ռեսուրսների կրճատմանը, Իսրայելը և Թուրքիան ԱՄՆ աջակցությամբ շարունակում են ճնշում գործադրել Իրանի վրա՝ ստիպելու նրան հրաժարվել տարածաշրջանային գերիշխանությունից:

Թուրքիայի արտգործնախարար Հաքան Ֆիդանը Al Jazeera-ին տված հարցազրույցում ուղղակիորեն հայտարարել է, որ Իրանը հսկայական ռեսուրսներ է ծախսել «տարածաշրջանում իր նվաճումների համար», ակնարկելով, որդրանք անիմաստ էին։

Թեհրանի ուրբաթօրյա աղոթքի ղեկավարի պաշտոնակատար Սեյեդ Մոհամմադ Խաթամին կոչ է արել Թուրքիայի արտգործնախարարին ներողություն խնդրել նման հայտարարությունների համար և խուսափել դրանք կրկնելուց՝ ասելով, որ դա կբխի Թուրքիայի շահերից:

Իրանում ասում են, որ դեռ ոչինչ ավարտված չէ, և ամեն ինչ կարող է փոխվել։ Սիրիական Լաթաքիայում տեղի ունեցած վերջին իրադարձությունները ցույց են տալիս, որ վերջնական արդյունքը չի ձևավորվել, և ԱՄՆ-ի խաղադրույքը Թուրքիայի և իսրայելամետ Ադրբեջանի վրա կարող է տապալվել:

Իրանն այժմ Հարավային Հայաստանում դիմակայում է Թուրքիային և Իսրայելին՝ փորձելով կանխել Մեղրիի ճանապարհի բացումը, որը վերջնականապես կմեկուսացնի Իրանը Եվրոպայից։ Միևնույն ժամանակ, Թուրքիան և Ադրբեջանը սկսել են Իրանի վրա ճնշման վճռական կարևոր փուլը։ Ալիևն ու Էրդողանը սկսեցին խոսել Նախիջևանի մասին, որը իբր պետք է «վերադարձնել» թյուրքական աշխարհ։

ԱՄՆ-ը պաշտոնապես չի հայտնել իր դիրքորոշումն այն մասին, թե ինչպես է գնահատում Թուրքիայի գործողությունները  տարածաշրջանում, և արդյոք տարածաշրջանային հարցերը, այդ թվում՝ Հայաստանի սահմանային խնդիրները, կլինեն ԱՄՆ-Իրան բանակցությունների օրակարգում։