Դիտորդները մեղադրում են Սիրիայի նոր իշխանություններին տասնյակ ալավիների սպանության մեջ

ВВС

Սիրիայի նոր կառավարությանը հավատարիմ անվտանգության ուժերը արևմտյան Լաթաքիա նահանգում գնդակահարել են ալավիական փոքրամասնության 52 մարդու, հայտնում է Մեծ Բրիտանիայում տեղակայված Մարդու իրավունքների սիրիական դիտորդական կենտրոնը (SOHR):

SOHR-ը վկայակոչում է տեսագրություններ, որոնցում երևում է, թե ինչպես են տասնյակ քաղաքացիական հագուստով դիակներ կուտակվել Լաթաքիայի տներից մեկի այգում:

Երկրի ՆԳՆ-ի աղբյուրը սիրիական պաշտոնական SANA լրատվական գործակալությանը տված հարցազրույցում խոստովանել է, որ եղել են «առանձին ​​խախտումներ» և խոստացել է դադարեցնել դրանք։

BBC-ն չի կարողանում ճշտել այն պնդումները, որ տղամարդիկ սպանվել են Սիրիայի նոր կառավարիչների տակ գտնվող ուժերի կողմից:

Ավելի վաղ հայտնի էր դարձել Լաթաքիայում ուժայինների եւ պաշտոնանկ արված նախագահ Բաշար ալ Ասադի կողմնակիցների միջեւ բախումների մասին։ SOHR-ի տվյալներով՝ դրանցում մահացել է ավելի քան 70 մարդ։

Ինչպես նշել է կազմակերպությունը, դրանք ամենակատաղի բախումներն են դեկտեմբերին Ասադի տապալումից հետո։

Ըստ SOHR-ի՝ զոհվածների թվում են անվտանգության աշխատակիցներ, Ասադին հավատարիմ զինյալներ և խաղաղ բնակիչներ:

Ծովափնյա շրջանը ալավիական փոքրամասնության կենտրոնն է և այդ էթնիկ խմբին պատկանող Ասադների ընտանիքի հենակետը։

Համայնքի անդամներն ասում են, որ երկրում իշխանափոխությունից հետո հետապնդումների են ենթարկվել հատկապես գյուղական վայրերում:

Հաղորդվում են նաև Հոմս և Հալեպ քաղաքներում բախումների մասին:

Հինգշաբթի օրը սիրիական Sana գործակալությունը հայտնել է, որ պաշտոնանկ արված նախագահի կողմնակիցները հարձակվել են Միջերկրական ծովի ափին գտնվող Ջաբլե քաղաքի հսկիչ անցակետերից մեկի վրա։

Այս վայրի մոտ է գտնվում ռուսական «Խմեյմիմ» ավիաբազան։

Արաբական լրատվամիջոցները հայտնում են ավելի քան 150 զոհի մասին։