Արցախում հեռարձակված «Գոյամարտ»-ը վերադառնում է
- 16:40 10.03.2025
ՀՀ Արդարադատության նախարարության իրավաբանական անձանց պետական ռեգիստրի կողմից գրանցվել և գործունեության իրավունք է ստացել ««Գոյամարտ» պատմատեղեկատվական վերլուծական կենտրոն» հասարակական կազմակերպությունը։
«Գոյամարտ»-ը, որպես հաղորդաշարի ազդականչ, առաջին անգամ Արցախի Հանրապետության հեռուստատեսության եթերում հնչել է 1993թ. հոկտեմբերի 17-ին և ամենշաբաթյա հաճախականությամբ շարունակվել մինչև 2023թ. սեպտեմբերը:
30 տարիների ընթացքում «Գոյամարտ»-ը հաղորդումների, վավերագրական և ռազմաուսումնական տեսաֆիլմերի ձևաչափով հեռուստադիտողի դատին է ներկայացրել ավելի քան 2000 թողարկում:
«Վայրիվերումներով լի մեր ոչ հեռավոր անցյալը վերհիշելու, այդ պատուհանից ներկան գնահատելու և, իհարկե, հնարավորինս, ապագան ուղենշելու անհրաժեշտության մղումով «Գոյամարտ»-ի ստեղծման ակունքներում կանգնած մի շարք համախոհներ որոշել են անդրադառնալ նախկին ու ներկա իրողություններին և փորձել հնարավորինս անաչառ վերլուծություններով ներկայացնել ինչպես հայրենական փառավոր հաղթանակների, այնպես էլ ցավալի պարտությունների պատճառահետևանքային կապերը»,- ասվում է հաղորդագրությունում։