Մանե Թանդիլյանը դադարեցրել է հացադուլը, Կաթողիկոսը կոչ է արել Ռուբեն Վարդանյանին ևս դադարեցնել հացադուլը
- 21:11 12.03.2025
«Ապրելու երկիր» կուսակցության համահիմնադիր Մանե Թանդիլյանը, որը հացադուլ էր հայտարարել մարտի 1-ից դադարեցնում է հացադուլը: Այս մասին նա նշեց այսօր՝ մարտի 12-ին, Ազատության հրապարակում մամուլի ասուլիսի ժամանակ:
«Մարդիկ սկսեցին տեսնել Ռուբենին, ո՞վ է, ինչպիսին է, ինչի՞ մասին է Ռուբեն Վարդանյանը, ի՞նչ է անում Բաքվի բանտում Հայաստանի, հայ ժողովրդի համար։ Միայն ուղեղով տկարները չեն տեսնում»,- ասաց հացադուլ հայտարարած Մանե Թանդիլյանը։
Նա նշեց, որ երեկ ու այսօր հեռախոսազրույցներ են ունեցել Ռուբեն Վարդանյանի ընտանիքի անդամների՝ կնոջ ու քրոջ հետ, հորդորել են դադարեցնել հացադուլը։
«Մենք խոստացել ենք, որ կդադարեցնենք հացադուլը»,-հայտարարեց Մանե Թանդիլյանն, ու հրապարակեց Ռուբեն Վարդանյանի քրոջ՝ երգահան, բարերար Մարինա Ալեսի խնդրանքի ձայնագրությունը։
Նշենք, որ հացադուլի ընթացքում ժամանակ առ ժամանակ Թանդիլյանի առողջական վիճակը վատթարանում էր եւ նա ստիպված էր լինեում տեղափոխվել հիվանդանոց:
Միաժամանակ Ամենայն Հայոց Կաթողիկոս Գարեգին Երկրորդը Բաքվի բանտում գտնվող Ռուբեն Վարդանյանին կոչ է արել դադարեցնել հացադուլը։ Այս մասին ասված է Մայր Աթոռի Գերագույն հոգեւոր խորհրդի ընդունած հայտարարության մեջ՝ Վեհափառ Հայրապետի գլխավորությամբ։